Durante e reunion Tripartiet cu a tuma luga na Den Haag, e delegacionnan di Aruba, Corsou y Sint Maarten a aproba un resolucion historico. E paso aki ta bini como reaccion directo riba e decision unilateral di Hulanda pa abstene di vota (“onthouding”) riba e resolucion di Nacionnan Uni (UN) di dia 25 di maart ultimo, caminda a reconoce sclavitud y e trafico transatlantico di catibo como un di e pio crimennan contra humanidad.
E proposicion inicial, presenta pa parlamentario di Aruba, Shailiny Tromp-Lee, y sostene pa su colega Seferina di Corsou, a conduci na un postura unifica contra e forma di actua di Hulanda dentro di Reino.
Un fayo no isola y sigur no un omision casual
Segun Shailiny Tromp-Lee, no vota na fabor di e resolucion di UN sin consulta cu e islanan no ta simplemente un otro decision mas. E ta mishi directamente cu e historia, identidad y e esfuersonan continuo di e islanan pa locual ta trata conscientisacion, educacion y sanacion di e heridanan di sclavitud.
“Aki no ta trata di un fayo incidental of un simpel fayo di comunicacion,” Tromp-Lee a accentua. “E caso aki ta subraya un problema hopi mas profundo. Hulanda ainda no ta mira Aruba, Corsou y Sint Maarten como partnernan igual dentro di Reino. Lamentablemente, esaki ta cuadra den un patronchi mas amplio caminda decisionnan internacional ta wordo tuma sin envolve nos paisnan, ignorando structuralmente nos interesnan y sensibilidadnan.”
Si e disculpanan presenta pa sclavitud den pasado tabata realmente un comma y no un punto final, esey mester ta bisto den e actuacion di Reino riba escenario internacional. Den e cuestion aki, esey no a resulta di ta e caso.
Exigencianan concreto den e resolucion aproba
E resolucion, cu a keda firma pa e lidernan di delegacion di e tres parlamentonan, ta formula exigencianan masha cla pa e Gobierno di Reino (Koninkrijksregering):
Rechaso absoluto: E parlamentonan ta declara cu e posicion di abstencion di e Reino na UN sin previo consulta ta totalmente inaceptabel.
Protocol structural di consulta: Ta exigi un consulta previo, na tempo y cu contenido obligatorio for di e prome fase (“initiëringsfase”) riba posicionnan internacional similar. Ningun posicion di Reino riba sclavitud of derechonan humano por wordo determina unilateralmente mas.
Igualdad den practica: E principio di igualdad dentro di Statuut mester wordo respeta den practica, garantisando un rol structural pa e paisnan Caribense den decisionnan di Relacionnan Exterior cu ta toca nan directamente.
Entrega via IPKO
E resolucion aki a keda aproba formalmente dia 5 di juni 2026 na Den Haag. E tres delegacionnan Caribense a duna encargo pa, via di e Interparlementair Koninkrijksoverleg (IPKO), entrega e documento aki oficialmente na e delegacion di Staten-Generaal (Hulanda).
E peticion ta urgente: e Gobierno di Reino tin un plaso di tres luna pa bini cu un contesta por escrito y un propuesta concreto pa un restructuracion di e proceduranan di consulta, basando structuralmente riba e principio: “Geen besluiten over ons verleden, zonder onze stem in het heden” (Ningun decision riba nos pasado, sin nos bos den presente).
