Awe mainta den sala di Corte di Husticia tabata reina un situacion hopi emocional den e caso penal contra e Colombiano O.D.P. (36), kende ta wordo acusa di a dal un mama y su yiu turista y core bay. E mama L.Wernet a muri despues.
Por a compronde cu e yiu muher Rodriguez, via video conference a exigi pa duna castigo di bida largo den prison pa O.D.P. cu a dal nan cu auto y core bay.
ACUSACIONNAN
Fiscal ta acusa e homber Colombiano O.D.P. (36) biba na Aruba, cu dia 27 December 2025 como chofer a dal dos peaton cu consecuencia un di e personanan, e dama L.Wernet a fayece. D.P. tabata stuur bao influencia di alcohol, no a paga tino riba aminda, a core sin luz y a core cu glas getint scur.
Via video conference e yiu muher di e victima, M.Rodriguez, a sigui tratamento di e caso y a haci uso di e derecho pa expresa su mes.
DAL MAMA CU YIU CU AUTO Y CORE BAY
Hues a mustra cu segun e rapport di Polis, e accidente a sosode mas o menso 7.30 di anochi. Polis a haya e dos victimanan den situacion serio mientras cu e chofer a core bay. E dama L.Wernet a keda interna den cuido intensive y a fayace na Januari 2026.
Ta asina cu O.D.P. a pidi disculpa na Rodriguez. El a bisa cu no tabata su intension. Por a mira cu Rodriguez tabata hopi tristo y tabata yora.
Hues a puntra con O.D.P. a dal nan. Segun O.D.P., e caminda no ta pa cana pasobra tin hopi yierba. El a bisa Hues cu hendenan cu ta cana riba e acera, ta kita for di e yierbanan y cana ariba caminda pa sigui cana. Hues a puntra D.O.P. si el a mira nan. Segun O.D.P., el a mira nan riba e caminda mas o menos 2 meter leu pero no por a haci nada. Ariba preguntanan haci pa Hues, O.D.P. a bisa cu e ta conciente di e situacion na e caminda. Hues a puntra cu esey no tabata motibo pa paga mas tino cu hendenan lo subi caminda. Segun O.D.P., despues di e accidente a haci e pidi mondi limpi.
Hues a bisa cu e pregunta ta keda, pakico O.D.P. no a mira e dama Rodriguez y su mama Wernet. O.D.P. a bisa cu el a mira nan tabata cana y na dado momento nan a desvia di e pida mondi y subi caminda. E momento ey e no por a desvia mas. Hues a remarca cu O.D.P. tabata sa di e situacion di e caminda y cu e mester tabata mas atento kico e dos personanan lo bay haci. Hues a remarca, sea nan ta para of nan ta bay sigui cana. Hues ta haya cu O.D.P. mester a anticipa kico e hendenan lo haci. Segun O.D.P., e lo mester a para pero a sigui core pasobra e no a anticipa cu nan lo bay subi caminda.
BOU INFLUENCIA
Hues a mustra cu den Bam Bam Café, O.D.P. tabata bebe 4 ora cu amigonan. Ariba video di seguridad den e bar por a mira cuanto e tabata bebe. Hues a puntra O.D.P. si e bebidanan no a afecta e reaccion di O.D.P. Segun O.D.P., e tabata bon na tino y cu e bebidanan no tabatin influencia riba dje. Hues a remarca cu 220 micro gram di alcohol ta permisibel pa core auto. Esey ta mas o menos 2 cerbez. Hues a bisa cu for di video por mira O.D.P. a bebe 9 cerbez, 7 shot. Hues a remarca cu esey ta mucho mas cu loke ley ta permiti. Hues a puntra si e glasnan getint lo a haci dificil pa O.D.P. wak e hendenan. Segun O.D.P. e tabata mira bon. Hues a mustra cu na Polis, O.D.P. a bisa cu anochi e ta dificil pa mira. Hues a mustra cu investigacion a mustra cu e luznan dilanti di e auto, no tabata traha bon.
CORE BAY Y SCONDE AUTO
Segun O.D.P. e tabata wak bon. Hues a mustra cu 23 Januari 2026, Polis a detene O.D.P. pasobra el a core bay despues di a dal e dos hendenan. Hues a mustra cu Polis a wak videonan di seguridad caminda por mira O.D.P. sali for di Bam Bam Café. O.D.P. a bisa Hues cu e tabata den shock despues di e dal e peatonnan y pesey no a bay Polis.
Hues a bisa cu despues O.D.P. a bay sconde e auto. O.D.P. a admiti cu el a bay laga e auto serca un amigo na Alto Vista.
MIEDO PA ENTREGA SU MES
Hues a remarca cu ta comprendibel cu hende por ta den schock y despues ta bay Polis. Pero O.D.P. no a haci asina. O.D.P. a bisa Hues cu e tabata pensa hopi cos y pesey no a bay entrega su mes. El a bisa Hues cu e tabatin miedo.
Hues a mustra cu Polis a papia cu un dama cu tabata bin den direccion contrario y a declara cu el a mira un pick up tabata core zig zag y no tabatin iluminacion bon. Hues a bisa cu tras di e pick up tabata O.D.P. Hues a bisa cu e imagenan di video ta mustra cu O.D.P. a sali for di Bam Bam Café ta cana burachi. Segun O.D.P., e tabata bon. Hues a sigui bisa cu na altura di Fantastic Garden por a mira for di camera di seguridad cu O.P.D. tabata core den e parti di direccion contrario. Segun O.D.P., esey tabata un descuido y no cu e tabata core burachi. Hues a sigui bisa cu for di camera di seguridad den Caya Musica mas o menos 7.37 di anochi, ta mira cu O.D.P. a brake y ta scucha un zonido fuerte y e auto Honda Fit ta desvia y core bay. Por scucha autonan ta pitra y hendenan ta baha for di auto y ta bay na unda e peatonan a wordo gedal.
Hues a bisa cu Polis a scucha diferente testigo entre otro coleganan di O.D.P. cu tabata den Bam Bam Café. Nan a bisa cu nan tur tabata bebe pisa y O.D.P. tambe. Segun O.D.P., no ta berdad cu el a bebe pisa.
Ta asina cu despues di e accidente, O.D.P. a bolbe bay Bam Bam Café. El a bisa cu el a bay cumpra cuminda pa su primo.
Polis a bin haya e auto scondi na Alto Vista. A constata cu e bentananan tabata di mas getint, e lusnan no tabata bon. A conclui cu e auto no tabata adecua pa ta core riba caminda. E auto y cellular di O.D.P. a keda confisca.
VICTIMA TA PIDI BIDA LARGO DEN PRISON
E dama Rodriguez, hopi emocional, a bisa Hues cu esaki tabata un di e momentonan mas dramatico cu el a pasa. El a bisa cu el a keda afecta door cu su mama a fayece a consecuencia di loke a pasa. El a bisa cu el a keda afecta emocional, cu e ta haya flash back. Rodriguez, na yoramento a bisa cu su mama tabata tur cos p’e. El a bisa cu ta promer biaha cu nan a pasa vacacion na Aruba. El a bisa cu el a keda cu cicatriz na su frenta door di e accidente. Esaki a afecta su confianza den su mes. El a bisa cu e no ta sali mas y ta keda cas sufri di entre otro depression, post dramatic stress.
Rodriguez a bisa Hues cu mester duna O.D.P. bida largo den prison pa loke el a haci.
CHOFER A PIDI PORDON
Por a mira cu O.D.P. tabata hopi emociona pa papia. A dura un poco promer cu el a pidi pordon na Rodriguez. El a yora y bisa cu e poco palabranan cu e bisa, e no por trece mama di Rodriguez mas. Tanto O.D.P. como Rodriguez tabata yora. El a bisa cu e sa cu Rodriguez ta pasando malo door di su culpa. El a bisa cu e ta spera cu Rodriguez lo por pordon’e.
Hues a remarca cu na 2022, O.D.P. tabatin un caso di core bou influencia y mester a paga boet di 300 florin y sigui curso tocante core bou influencia di alcohol.
Hues a remarca cu apesar di a sigur curso, O.D.P. ta bay bebe den Bam Bam Café y despues ta subi auto y causa e accidente caminda un dama ta fayece.
FISCAL TA EXIGI 3 AÑA DI PRISON
Fiscal a bisa cu e mama y su yiu a bin Aruba pa pasa vacacion pero esaki a resulta den accidente caminda e mama, despues di un tempo di intensive care, a fayece. Rodriguez awor tin cu sigui biba sin su mama. Fiscal ta haya cu den e caso aki O.D.P. door di su culpa a causa e accidente aki. For di investigacion por mira cu O.D.P. tabata 4 ora den Bam Bam Café ta bebe cu amigonan. Despues di a sali di eynan el a dal Rodriguez y su mama Wernet y core bay. Fiscal ta haya cu O.D.P. tabata core no cuidadoso. El a mustra cu e luznan dilanti no tabata traha bon y e glasnan di auto tabata getint. Fiscal a mustra cu O.D.P. tabata sa di e situacion riba Caya Musica pero asina mes e no a tene cuenta cu esaki. Fiscal ta haya cu O.D.P. ta responsabel pa e morto di Wernet. El a mustra cu despues di e accidente, O.D.P. a core bay.
Pa cu e castigo, Fiscal a bisa cu Rodriguez ta exigi bida largo. Esey no ta e caso segun leynan di Aruba. Fiscal a bisa cu O.D.P. mester biba cu el a kita bida di un hende. Fiscal a exigi 3 aña di prison y 4 aña sin rijbewijs. El a bisa cu por debolbe O.D.P. e cellular pero e auto mester keda confisca.
ABOGADO
Mr. Carlo a expresa condolencia na Rodriguez. El a bisa cu e no ta haya cu O.D.P. tabata core no cuidadoso y a pidi pa declara O.D.P. liber. El a bisa cu Polis no a haci test di rosea y tampoco sanger cu O.D.P. Na opinion di abogado, no por prueba cu O.D.P. tabata bou influencia di alcohol y pesey mester declar’e liber. E abogado a bisa cu O.D.P. no por a evita e accidente. E caminda tabata cubri cu un pida mondi cu ta haci cu peatonnan mester desvia di esaki, subi caminda pa sigui cana. Door di esaki, O.D.P. no por a kita na tempo ora e dos personanan a subi caminda. El a remarca cu no a haci autopcia pa determina kico tabata e causa di morto di Wernet. E abogado a mustra cu e testigo cu tabata bin den direccion contrario, a mustra cu un vehiculo grandi, parecido na patruya di Polis, tabata core zig zag y a dal contra e dos personanan. E abogado a bisa cu O.D.P., despues di e accidente, a spanta y core bay. El a pidi Hues pa tene cuenta cu tur esaki ora di dicta sentencia. E abogado ta haya cu O.D.P. mester haya castigo no mas largo cu loke ya el a sinta caba.
Hues a sera tratamento di e caso y a bisa cu 3 Juli 2026, lo tin sentencia.