Dialuna mainta, Parlamento di Aruba a bira e escenario pa un reunion caminda Minister di Deporte y Ensenyansa, Gerlien Croes, tabata presente. Sinembargo, e sesion a keda marca pa e falta di contesta concreto rond di su biahe recien den un jet priva, un asunto cu te awe ta keda sin claridad debi cu e mandatario no a duna e detayenan rekeri na e representantenan di pueblo. Ta bon cla cu e mandatario no ta respeta Parlamento di Aruba.
E falta di informacion riba e uso di fondo publico pa e biahe aki tin bista pa varios sector como un falta di transparencia. E actitud aki ta wordo interpreta como un falta di respet pa e organo di mas halto di nos Pais, lantanando duda riba e integridad y seriedad cu e posicion di minister ta exigi.
Cuestionamento riba maneho y supervision parlamentario
E criticanan contra Minister Croes no ta limita solamente na e polemica di e jet priva. E mandatario ta wordo cuestiona pa su maneho den situacionnan caminda, a actua fuera di e proceduranan legal standard di Pais Aruba tambe.
Entre nan ta menciona pa su opositornan ta e tardansa den apunta un Minister Plenipotenciario y e asuncion di e encargo di “Minister di Relacionnan di Reino” sin cu, e cambionan di ley necesario of e aprobacion den cuadro di e Ley di Integridad di Mandatario (LIM) a wordo finalisa.
E situacion aki ta pone focus tambe riba e parlamentarionan cu ta apoya e coalicion AVP-FUTURO. En bes di eherce un control democratico estricto, e miembronan di e fraccionnan AVP-FUTURO ta opta pa duna un apoyo incondicional aparentement, loke ta debilita e sistema di “checks and balances” y ta afecta e imagen di seriedad politico di Aruba.
Atencion for di Hulanda riba integridad den Reino
E presion riba e maneho aki a hala atencion internacional tambe. For di Den Haag tin señalnan cu e bista ta keda fiha riba e actuacionnan di e Gobierno actual. Den e cuadro di relacionnan den Reino, caminda integridad y transparencia ta pilarnan fundamental, cualkier desviacion di e normanan estableci ta wordo observa cu hopi cautela. Minister Gerlien Croes ta dunando Aruba un mal nomber y hopi desconfiansa den Reino Hulandes ? como Minister
E falta di contesta cla den Parlamento por wordo percibi como un debilidad den e gobernacion local. For di exterior, observadornan ta analisa con e politica na Aruba ta move, cuestionando si e decisionnan ta wordo tuma abase di transparencia of si tin un falta di boluntad pa duna cuenta (accountability) na comunidad.
E pregunta cu ta keda den aire den sala di Parlamento ta te ki ora e falta di informacion aki lo persisti. Un sistema democratico madura ta exigi contesta, transparencia y un respet absoluto pa e leynan cu ta goberna nos pais.
Mantene silencio riba e detayenan di un biahe di trabou solamente ta aumenta e persepcion di un crisis di integridad den e gobernacion actual. Pueblo di Aruba tin derecho di sa con su placa ta wordo gasta y merece mandatarionan cu ta duna cuenta di nan actonan cu transparencia total.
Cu e biahe di trabou pa bay haci bunita na Corsou Minister Gerlien Croes kier gasta placa di pueblo con cu ta, sin duna parlamento informacion ?
E pregunta cu ta keda den aire den sala di Parlamento awe ta: Te ki ora e falta di transparencia aki lo wordo tolera?