E siman akí Afvalzorg, un spesialista riba tereno di lèntfel na Hulanda, a kuminsá ku su trabounan na e sitio di depositá shushi Lagun di Selibon. Den e simannan binidero Afvalzorg ta traha riba atendementu ku e kandelanan bou di tera i mehorashon di maneho di shushi na Boneiru. Esaki ta tuma lugá riba enkargo di Entidat Públiko Boneiru.
A identifiká e kandelanan bou di tera
Huntu ku e tim di Selibon, Afvalzorg a investigá e situashon na Lagun. Pa medio di inspekshon visual i midimentu, nan a haña mas òf ménos 15 kandela ku ta kimando bou di tera. E kandelanan ta di tamaño limitá, pero nan ta forma un riesgo pa salú di hende i pa medio ambiente.
Preparashon di un plan di aserkamentu
Afvalzorg ta trahando awor riba un plan di aserkamentu. Den e plan akí nan ta formulá kon por paga e kandelanan na un manera seif. Tambe nan ta inkluí medidanan pa mehorá e maneho di shushi na Lagun. Durante e preparashon tin hopi atenshon pa kolaborashon ku kuerpo di bombero, GGD i e hendenan ku ta biba den bisindario.
Enkuentro pa habitantenan den bisindario
Promé ku nan kuminsá ku e ehekushon, nan ta deliberá tokante e plan ku e hendenan ku ta biba den bisindario. Djamars anochi 24 di yüni 2025 un enkuentro di informashon ta tuma lugá na Jong Bonaire, for di 18:00 or te 20:00 or. Durante e enkuentro akí Entidat Públiko Boneiru, Afvalzorg i Selibon ta duna splikashon tokante e plan. Tin espasio pa pregunta, preokupashon i sugerensia. Tur hende ta bon biní.
Ekspertonan eksperensiá ta duna konseho
Afvalzorg a bin Boneiru ku un gerente eksperensiá di lèntfel. E eksperto akí ta konsehá Entidat Públiko Boneiru i Selibon tokante mehorashon di maneho di shushi. Di e manera ei por dominá fluhonan di shushi mas mihó, redusí riesgo i mehorá bashamentu di e asina yamá ‘restafval’.
Kolaborashon riba término largu
Entidat Públiko Boneiru a sera un akuerdo di kolaborashon duradero ku Afvalzorg. Di e manera akí den futuro tambe nan konosementu i eksperensia ta keda disponibel pa Boneiru. Ku ayudo di Afvalzorg lo no manehá i riba término sera solamente Lagun, pero e sitio di depositá shushi na Morotin tambe.
Entidat Públiko Boneiru ta asumí responsabilidat
Ku e kolaborashon akí Entidat Públiko Boneiru ta duna kontenido na e ‘last onder bestuursdwang’ ku a imponé riba Selibon, pa motibu di violashonnan konstatá na e sitio di depositá shushi Lagun. Kolegio Ehekutivo ta mira e paso akí komo un aporte importante na maneho responsabel di shushi i na un ambiente di biba saludabel na Boneiru. Pa e motibu akí Entidat Públiko Boneiru ke ehekutá e konsehonan di Afvalzorg na un manera rápido i diligente.
