Universidat di Kòrsou Dr. Moises Da Costa Gomez (UoC) i Tourism Corporation Bonaire (TCB) a inisiá un koperashon na Boneiru pa desaroyá talentonan lokal den e sektor turístiko i hospitality riba nivel di HBO.
Durante di un seshon di informashon, ku a tuma lugá na Captain Don’s Habitat, e direktor di TCB, señor Miles Mercera a splika ku Boneiru ta spera un kresementu enorme den e sektor turístiko. Segun señor Mercera, lo bin 1000 pa 1200 kupo di trabou den e sektor aki. Pesei e ta kontentu ku TCB lo bai traha huntu ku UoC pa por brinda e International Hospitality & Tourism Management (IH&TM) program na talentonan lokal na Boneiru.
Señora Pamela Rush, Program Director di e IH&TM program a duna splikashon tokante e estudio di bachelor. E ta un estudio di kuater aña ku a keda desaroyá, basá riba e demanda di e sektor turístiko i di hospitality. E studiantenan ta risibí un preparashon amplio ku ta enserá ku ta dediká hopi atenshon na eksperensia práktiko i eksperensia den e sektor.
UoC ta ofresé e posibilidat na e studiantenan di Boneiru pa permanesé riba Campus di universidat.
