Papa Francis a fayece na edad di 88 aña. E tabata den hospital pa cinco siman cu pneumonia dobel y recientemente a sali for di hospital. E argentino, nasi komo Jorge Mario Bergoglio, tabata na cabes di e iglesia Catolico Romano for di 2013.
“Amigonan, ta cu tristesa profundo ta anuncia e morto di Santu Tata Francesco”, asina kardinal Kevin Farrell a bisa den un video di Vaticano. Den su 12 aña como Papa, Francis a sufri di diferente problema di salud. Dia 14 di februari, el a keda interna den hospital cu un pneumonia dobel. El a keda mas cu cinco siman den hospital Gemelli. Dia 23 di maart, despues di 38 dia, el a sali for di hospital y a regresa na su residencia na Vaticano.
E Papa a aparece ainda riba e balcon di Basilica di San Pedro na Vaticano ultimo. E no tabata e persona cu tabata duna e bendicion anual di Pasco. Tambe el a tene un reunion cortico cu e vicepresidente Mericano, J.D. Vance.
Papa Francis tabata e prome papa di Sur Amerika
E Argentino tabata e prome papa for di Sur Amerika y hasta for di e hemisferio sur. Ademas, el a bira e prome jesuíta cu a bira Papa.
Papa Huan Pablo II a nombra Bergoglio bispu auxiliar na 1992. Seis aña despues el a bira Arsobispo di Buenos Aires, y na 2001 Bergoglio a bira cardinal. Na 2013, su predecesor Benedicto XVI a renuncia inesperadamente pa motibonan di salud, y na sorpresa di tur hende, Bergoglio a wordo eligi como hefe di Iglesia Romano-Katolico. Esaki a crea e situacion unico di dos Papa bibo, cu a dura te dia di fiesta di aña 2022, ora cu Benedicto a fayece na edad di 95 aña.
Segun e cuenta Catolico, Francis tabata e di 266 papa. E tabata e prome papa cu a scoge e nomber aki, como un homenahe na Francis di Assisi, un santo cu a defende pobernan.
Papa Francis a logra drecha e imagen di iglesia
Desde su Asuncion, el a logra di drecha parcialmente e imagen deplorabel di Iglesia. Den hopi sentido, Francis tabata e contrario di su predecesor y a sigui un curso hopi mas progresivo cu su predecesor conservador. Manera Francis di Assisi, el a pone su mes na prome luga den lucha contra pobresa y a nombra mas hende muhe na posicionnan importante den iglesia.
Ademas, Francis a papia hopi mas fuerte contra abuso sexual den iglesia cu su predecesornan y tabatin un bista mas modera riba asuntonan sensitivo manera aborto y homosexualidad, aunke e tabata haci declaracionnan critico y no diplomatico riba e topiconan ey.
Tambe el a haci su mes fuerte pa e destino di refugiadonan y a papia durante e gueranan na Siria, Ucrania y Gaza. Na januari e tabata critico di e plannan di presidente Mericano Donald Trump pa deporta migrante ilegal riba un scala masivo. E tabata preocupa pa medio ambiente tambe.
Papa Francis ta haña un entiero modesto
Papa Francis lo tin un entiero sumamente modesto. E mes a adapta e reglanan pa esaki. Ora un Papa muri, e funeranan grandioso ta un tradicion na Roma. Te cu awor nan ta sigui ritualnan unico y precies. Sinembargo, na april di aña pasa, Francis a aproba un regimen nobo di entiero pa papa cu e titulo latino Ordo Exsequiarum Romani Pontificis. E ritus renoba ta pa haci claro cu e entiero di un papa ta esun di un ‘pastor y discipel di Cristo y no esun di un homber poderoso di e mundo akí’, Francis a bisa e tempu ey y a haci e cambio. Paz na su resto
