Featured Bonaire Internacional

Willem Cecilia: Mi por a tuma nota ku gobièrnu di Boneiru a laga ehekutá un enkuesta pa sondea kiku ta e sentimentunan riba e isla pa ku bakunashon kontra di Covid-19


Banda di un enkuesta ‘online’ tambe a tene entrevista personalmente. E servisio di Reino Caribe Hulandes na òktober 2020 tambe a hasi un investigashon di media via internèt. E servisio di Reino Caribe Hulandes ta komuniká regularmente ku e pueblo di Boneiru i kier sa si esaki por otro òf mihó. Ku e konosimentu aki e por yega mas serka e pueblo pa informá esaki mas mihó i kompletu ku ta posibel.

Ku e investigashonnan aki e gobièrnunan según mi ta trata di kompilá informashon bálido di un grupo di hende pa asina por respaldá òf koregí nan maneho. E pueblo di Boneiru, mi ta asumí esunnan di 18 aña bai ariba ta forma e ‘grupo ophetivo’ ku den  mundu statístiko ta keda dominá ku e palabra ‘populashon’. Masha poko biaha i laga nos bisa kasi nunka tur hende den e populashon ta keda entrevistá òf ta pidinan pa komplementá un kuestionario. Investigashon pa loke ta trata e populashon den su totalidat afortunadamente no ta nesesario. Na su lugá ta selektá algun hende di e populashon i e hendenan aki ta wòrdu investigá. E grupu chikitu aki ta forma e asina yamá muestra. E deseo i nesesidatnan di e grupu chikitu aki ta keda investigá i ta sali for di punta di bista ku e resultado di e muestra ta konta pa henter e populashon. Ku otro palabra por generalisá e resultadonan. Sinembargo por generalisá solamente si e muestra ta repesentativo.

For di tur dos e investigashonnan ta ripará klaramente e ousensia di kuadronan pa loke ta trata e populashon. No a hasi un klasifikashon na edat, i tampoko di e lugá di nasementu di e habitantenan segun datos di e Büro Statístiko Sentral. No a hasi un kompartishon tampoko pa loke ta trata e seis barionan komplementá ku e bario di Sabadeco i Belnem kaminda hopi hulandes-oropeo i otro nashonalidatnan ta biba. Pa falta di e kompartishon aki ku den mundu statístiko ta yama ‘stratefikashon’ no ta posibel pa koregí riba variablenan disruptivo. Ademas no ta menshoná e margin di eror i e nivel di konfiansa. Ta dependé pisá riba e resultado optené via internèt resultando den un relashon hopi skùin kaminda e representashon ta difisil pa enkontrá.

E defensor di pueblo a señalá na 2019 ku e situashon finansiero di personanan di edat den Caribe Hulandes ta malu i na 2020 ela estimá ku 40 porshento di hogarnan tin hopi tiki ingreso pa por yega fin di luna. Konsiderando ku e kosto di vida na Boneiru ta hopi haltu, por konkluí ku un porsentahe haltu di hogarnan na Boneiru no tin internèt debí na e kostnan haltu di servisio di internèt i kompra di kompuiter. Ta akinan bo ta enkontrá hendenan ku probablemente no tin e habilidat pa anda ku kompuiter te pa nan subi internèt pa yena un enkuesta. Esunnan ku si ta subi ta mayoria biaha ta hendenan ku bon habilidat di kompuiter i ku tin un mihó òf bon edukashon i konsekuentemente entrada.

E resultado di un investigashon ku no ta representativo ta evidente. Extra Boneriano riba su promé página a informá ku tin un mayoria ku no kier bakuná. Ta sigui menshoná ku tin un grupo di mas grandi entre e respondentenan ku tin 60 aña òf mas i ta forma 35% sigui pa esun entre 50 i 60 aña. Pero den realidat e grupo di 60 aña òf mas konforme e datos di e Büro di statístika Sentral di 2020 ta apenas 20% di e poblashon.

E investigashon di e servisio di Reino Caribe Hulandes pa loke ta trata media tambe ta lèn hopi riba respondentenan via di internèt komplementá ku entrevistanan lokual ta provoká mesún erornan ku esun di entidat públiko di Boneiru. Un bèl ta kuminsá bati sin duda si bo tuma nota ku un stashon di radio na hulandes ta sali mas skuchá ku no ménos ku 60% siguí na gran distansia pa un stashon na papiamentu hopi popular ku 35%. Na 2018 esaki te ainda tabata 44% pa e stashon na papiamentu sigui pa esun na hulandes ku 40%. E diferensia no ta wòrdu spliká pero e resultado di 2018 ta yega ketu bai mas serka di e persepshon pa loke ta trata skucha radio. Ningun kaminda den e snèknan den bario mi no a topa unu ku tin un stashon di radio hulandes sintonisando. Straño ta ku e rapòrt ku e resultadonan di investigashon di media ku eksepshon di 2018 no por keda enkontrá riba internèt.

E ta kousa prekupashon ku investigashonnan komo tal ta parse di ta oumentá na Boneiru i ku gobièrnunan ta ahustá nan maneho riba e resultadonan. Mi no ta pleita pa hasi tur investigashon òf enkuesta a base sientífiko ku analisashonnan kompleho, pero mester bisa si ku investigashon i enkuestanan mester pasa e prueba di representashon. E resultado ta un investigashon bálido i konfiabel ku por keda generalisá. Si tòg gobièrnunan basa nan maneho  riba investigashonnan ku no ta representativo, anto ta violá un di e prinsipionan di bon gobernashon, den esaki e prinsipio ku mester ta kuidadoso.

Related posts

Pronóstiko di tempu pa Boneiru

EA News Author

Registrashon pa bakuna kontra corona ta pa 60+ Hende di 18 pa 60 aña por registrá despues

EA News Author

Gabinete Rutte a prolongá e lockdown na Hulanda te 9 febrüari

EA News Author

Leave a Comment