ORANJESTAD,Aruba
Den cuadro di Dia Nacional di Aruba, celebracion di Himno y Bandera, scolnan na Aruba ta organisa diferente evento cu ta cay bou di un di e vaknan cu ta duna tambe. Asina por ehempel awe e musiconan Vicente Ras y Michael Lampe tabata invitado na Filomena College pa comparti cu e hobennan nan conocemento.
Michael Lampe por ehempel a comparti cu e studiantenan e uzo di tecnologia den musica, unda cu alumnonan a cera conoci cu e sistema aki pa crea y innova musica. Lampe a probecha pa comparti e experencia cu e tin den area aki como productor musical.
El a splica con por ehempel e ta haci di elementonan tradicional y a crea algo nobo, manteniendo semper historia y cultura nobo pa e generacion nobo. Lampe a splica cu el a wordo compaña e mainta aki pa e maestro Vicente Ras, kende ta un di su ehempelnan den e musica tradicional di tambu. “Vicente mes ta un bon ehempel di un persona cu tabata hopi habri pa haci algo diferente de lo tradicional cu tambu. Nos a bay hunto Hulanda pa hiba cultura y tradicion musical di Aruba mas leu.”
A presenta un proyecto nobo cu e ta trahando riba dje, cu hobennan p’asina crea e link entre balor cultural y e toke moderno di e generacion nobo. “E muchanan ta hopi contento di ta forma parti di esaki y ta hopi interesa con pa uz’e den curriculum. Den e workshopnan a constata cu tin hopi talento hubenil na Aruba.”
E workshop ta forma parti di e vak di Papiamento na scol.
