Minister Maduro a reuni cu Comision di Evento Social di Parokia di Noord pa por haya sa mas di nan trabounan pa conserva e historia di Parokia di Noord.
Exposicion
Sr. Steve Geerman y sra. Rachel Croes-Frank di e comision a informa Minister Xiomara Maduro riba nan plan pa organisa un exposicion den luna di oktober 2020, di tur e artefactonan valioso y historico cu ta conta e historia di e Parokia di Noord.
Proteccion interior Kapel di Klooster
E comision a informa Minister Maduro riba e trabounan cu ta wordo haci pa mantene e Kapel di e Klooster di Imeldahof cu ta un monumento di Pais Aruba limpi. E Kapel tin mueblenan autentico y unico na Aruba. Pa sigura cu e interior di e Kapel por keda intacto, e comision a haci un peticion pa asina e interior di e Kapel tambe por wordo conserva como parti di nos herencia cultural.
Fundacion Kapel di Bethania
E comision tin intencion di lanta un fundacion pa asina maneha y proteha e Kapel, e inventario y algun lokaal den cercania di e Kapel. Di e forma aki e exposicion actual por bay forma parti di un museo permanente cu ta conta e historia di e Kapel, di e Soeurnan di Bethania y di e Parokia di Noord.
