Durante e próme luna di aña 2024, TCB a honra seis bishitante komo embahador di Boneiru.
Ta trata akí di Lisa i Terry McQueen ku ta bishitando Boneiru pa 10 aña konsekutivo. Nan a risibí feneta di plata na e okashon akí.
Leo Veseling i Michael Cain, ámbos prosedente di Merka, a keda honrá pa 25 aña di bishita na Boneiru i a risibí feneta di oro. Leo ta enkantá ku tur e áreanan di buseo i tambe e atmósfera relahante di Boneiru. “Despues di a bishitá Boneiru pa varios aña, nos tin rekuerdonan bunita di e isla akí, kaminda mi a kontraé matrimonio”, segun Michael Cain.
Rosemary Kurrti tambe ta un bishitante for di Merka ku a risibí su rekonosementu. E ta bishitando Boneiru pa 41 aña kaba. Esaki e ta hasi 2 pa 3 bes den un aña. E ta miembro di New York Big Apple Divers Scuba Club. Rosemary a risibí un plakat di platina na e okashon akí.
Nevin Sayre, un Hall of Fame Windsurfer US-9 di Merka, tambe a risibí su rekonosementu. Nevin ta e persona ku a hasi nos windsurfistanan lokal mundialmente konosí. Nevin a kontribuí en grande ku nos windsurfistanan, manera e rumannan Taty i Tonky Frans i nan primu Kiri Thodé. Djadumingu 28 di yanüari tabata su kumpleaño i un grupo di amigu ku na kabes Byron Tromp a trese Nevin dilanti na unda a dun’é su honor i rekonosementu komo embahador di Boneiru i a otorg’é un plakat.
Pa TCB Helen Mercera a ofisialisá e seremonianan i a hasi entrega di e sertifikado, e feneta i e plakat korespondiente na tur nos embahadornan nobo.
