Parlamentario Endy Croes ta felicita Gabinete Wever Croes y muy enparticularmente Minister Glenbert Croes pa cu e desicion tuma diabierna mainta den Ministerraad pa prolonga FASE te cu fin di December.
Fraccion MEP a manda un carta official:
Parlamentario Croes a splika den conferencia di prensa cu e ta masha agradecido na Gabinete Wever Croes pero muy enespecialmente Minister Glenbert Croes. Parlamentario Endy Croes tabata den contacto estrecho cu Minister Glenbert Croes ultimo siman alrespecto e tema aki. Asina a percura pa oficialmente manda un carta di cual henter Fraccion di MEP a firma y sostene pidiendo Gobierno pa extende FASE cu 3 luna mas esta October-November y December. Minister Glenbert Croes a percura pa e carta aki subi agenda di Ministerraad y asina wordo trata diabierna 2 di October. Parlamentario Endy Croes ta contento cu esaki a wordo extende y asina alivia dolornan di diferente cuidadano cu a wordo afecta den e crisis aki.
Mester solicita tur luna promer cu 10 di cada luna:
Dialuna awor por cuminsa aplika pa FASE pa cu luna di October y mester aplika tanto pa November y December tambe di nobo pa respectivo lunanan. Cada luna Bo mester aplika promer cu 10 di cada luna. Pues promer cu 10 di October despues promer cu 10 di november y por ultimo promer cu 10 di December. Esaki ta conta pa tur hende cu a perde trabow durante Covid 19 alavez pa ZZP’rs nan. Parlamentario Endy Croes ta termina splikando cu trabou di Parlamentario no solamente traha y aproba leynan pero tambe ta pa scucha pueblo su dolor, compronde cu exactitud kiko esaki ta ensera y reaciona cu posibel solucionnan alcaso usando e toolsnan cu ta na Bo alkanse. Covid 19 a afecta nos hopi duro mes y a afecta un grupo di hende hopi fuerte. Pa e gruponan aki cu ta sufriendo FASE ta un sosten y un alivio. Mescos nos lo bringando tambe pa e MKB steun di 4000 florin pa kwartal pa comerciantenan pa esaki tambe bay te cu December. E siman aki carta lo sali pa Minister di Finansas alrespecto MKB. Danki Gabinete Wever Croes pa alarga e sosten di FASE pa pueblo manera e meta di e Acuerdo di Gobernacion y Partido MEP ta stipula poniendo e ser humano central.