Den bon koperashon entre Entidat Públiko Boneiru i ministerio di Infrastruktura i Maneho di Awa, bou di direkshon di un Grupo di Direkshon konhunto di kua gezaghèber ta presidente, ya kaba a pone pasonan grandi pa loke ta trata mehorashon di infrastruktura di haf.
Dentro di poko ta hasi entrega di ekstenshon di Waf Nello Craane, i hasiendo esaki e trabounan den tres fase di renobashon di infrastruktura di haf di Playa ta bira un echo. Na aña 2018 na un manera inovativo a renobá Waf Nello Craane i a hasi Waf di Meimei adekuado pa por deskargá e barkunan di Don Andres einan i awor pues ta ekstenshon di Waf Nello Craane. Esaki tabata nesesario pa laga e barkunan krusero grandi mara na un manera seif i pa por laga e pasaheronan abordá i desembarká sin problema.
Mas aleu bou di ouspisio di e Grupo di Direkshon a mehorá e prosesonan i proseduranan na Servisio di Haf i Lots (Dienst Haven en Loodswezen), a formulá un ordenansa di haf ku dentro di poko Konseho Insular lo akordá i lo elaborá profeshonalisashon di Servisio di Haf i Lots mas aleu ku enfoke riba independisashon di e servisio aki pa e bira un Kompania di Haf. Ademas den kuminsamentu di aña Minister Cora van Nieuwenhuizen di Infrastruktura i Maneho di Awa i diputado di asuntunan ekonómiko a firma un konbenio, den kua ta stipulá e koperashon pa e añanan binidero kaminda independisashon di Haf i e posibel konstrukshon di un haf di karga nobo ta e metanan di maneho mas prinsipal.
Port of Amsterdam International a resultá un partner eksperto i eksperensiá pa logra tur e proyektonan aki adekuadamente.
Gezaghèber Rijna ta satisfecho tokante e koperashon den e Grupo di Direkshon aki i tokante e resultadonan ku a logra: ‘Pa medio di e koperashon den e Grupo di Direkshon aki ku e trahadónan di maneho di ministerio di Infrastruktura i Maneho di Awa i e manera di traha ku enfoke riba ehekushon, e konosementu i eksperensia di e kompania di haf di Amsterdam nos a logra hopi i pa e motibu aki gustosamente nos ke kontinuá ku nan pa alkansá nos metanan.’
