Recientemente Aruba Tourism Authority (A.T.A.) a presenta e plannan strategico pa mercadeo y relacionnan publico pa e mercado Norte Americano pa 2022.
A organisa diferente reunion pa e socionan di A.T.A. hunto cu Engine, e compania di publicidad encarga cu e parti creativo y compra di espacio y tempo den medionan Norte Americano, y Zeno Group, e agencia di relacionnan publico, pa presenta e obhetivonan di A.T.A. y ki instrumentonan y strategia ta uzando pa logra yega e metanan pa e siguiente aña calendario.
Durante di e estadia di representantenan di Engine y Zeno a probecha pa sigui amplia riba nan conocemento di Aruba su producto y servicionan turistico pa medio di varios actividad. E actividadnan aki ta sigui fomenta nan relacion y sincronisacion cu tur loke Aruba tin di ofrece y ta representa como isla y como destinacion pa e cliente y e futuro cliente. Asina nan ta bay bek nan oficinanan inspira pa sigui pusha Aruba como e miho destinacion den Caribe.
E presentacion pa e stakeholdernan a inclui un bista completo y tur detaye importante di e obhetivo y plannan di A.T.A. pa 2022.
E obhetivonan cu a discuti tabata:
- E recuperacion continuo di yegadanan pa atrae mas “first time visitors” (turistanan cu ta bishita Aruba pa e di prome biaha). E segmento aki a keda identifica como un di e esunnan mas importante.
- Fomenta “brand awareness”, esta e consciencia di “e marca Aruba” den e mercadonan principal, enfocando riba balor y experencianan personalisa cu ta encurasha e bishitante pa gasta mas. Esaki cu un enfasis continuo riba salud, desinfeccion y higiena.
- Expande e enfoke riba mercadonan geografico secundario di balor halto.
- Mantene enfasis fuerte riba e demanda di e segmentonan “niche” di balor halto.
Diferente otro topico a keda presenta y/of discuti, incluyendo un presentacion riba e estado actual y prediccionnan pa 2022 pa cu e cantidad y capacidad di buelonan. Esaki tabata na encargo di Aruba Airport Authority N.V.
Tambe a presenta e evolucion di segmentacion di mercado cu e resultadonan di un sondeo profundo cu a wordo organisa door di A.T.A. pa alinea e strategia y e acercamento creativo di e esfuersonan di mercadeo cu e obhetivo pa yega gruponan di interes di balor halto. E sondeo a inclui trendnan actual y e impacto riba biahamento, un auditoria competitivo, y a tene combersacionnan cu stakeholdernan local y internacional. Un di e otro puntonan importante ta kico ta e deseonan di vakantie cu biaheronan cu un poder di compra halto tin “en comun”.
A presenta e plannan integra di mercado (Integrated Marketing Plans) pa 2022 y e strategia di marca (Brand Strategy). E strategia di marca ta encera hopi punto di atencion importante, cu ta forma e fundeshi pa identifica y expone e oportunidadnan con pa posiciona Aruba en general, con pa posiciona Aruba pa e isla destaca entre tur otro destinacion, y con pa yega na un publico di balor halto, specificamente pa e industria di turismo di Aruba. E “highlight” tabata e presentacion di e campaña creativo nobo di Aruba.
Tanto e plan pa medionan di comunicacion y medionan social, como e plannan pa relacionnan publico y colaboracionnan cu influencers pa e mercado di Merca a wordo ricibi cu positivismo di parti di e socionan.
Aruba su turismo ta conociendo un recuperacion fuerte, continuo, vibrante y sumamente positivo. Tras un aña 2019 cu a marca diferente record den turismo pa Aruba, a enfrenta e retonan di e pandemia na añanan 2020 y 2021 cu esfuersonan bon coordina y hopi determinacion entre A.T.A. y tur partner. Aña 2022 ta premira como un aña pa stabilisa y sigui crece, cu metanan y obhetivonan defini pa yega un biaha mas, y hasta surpasa e recordnan di 2019. Esaki a keda refleha tambe den e plannan di mercadeo y relacionnan publico pa 2022.
