Awe mainta Wardakosta a detektá un kontakto ta drif den serkania di Kòrsou. E barku patruyero Zr.Ms. Friesland ku tabata nabegá den serkania, a bai tira un bista. Aserkando e boto e tripulashon a mira hende a bordo ku tabata zuai ku nan flèshlait. Una bes ku nan a yega mas serka di e boto e tripulashon a konstatá ku tabatin mas persona na bordo. E personanan aki a indiká ku nan boto a enkontrá problema ku motor i ku nan no por a sigui nabegá. Sentro di Reskate i Kordinashon di Wardakosta mesora a laga un boto patruyero sali pa duna asistensha na e boto i e personanan. Yegando na e lokalidat a resultá di ta trata di un boto ku na bordo 13 persona indokumentá. Tur 13 persona ku nashonalidat Venezolano di kua, seis dama, seis hòmber i un mucha a keda entregá na Kuerpo Polisial. E investigashon den e kaso aki ta andando.
Boto ta drif ku indokumentado a bordo hañá riba laman
