Dialuna Minister Maduro ta presente na Parlamento di Aruba pa asina haya aprobacion di Parlamento pa e cambio cu a wordo haci pa reduci e tarifa di impuesto riba importacion di material di construccion y tambe pa un cambio den e ley di comision di divisa pa exonera Estado Hulandes.
Rebaho tarifa di importacion material di construccion
Fin di aña 2020 Minister Maduro a decreta un cambio den e tarifa di importacion di material di construccion, pa rebaha esaki di 12 pa 10%. E rebaho aki ta forma parti di e pakete di Alivio Fiscal 2 cu a drenta na vigor 1 di januari 2021 y en principio ta caba dia 1 di januari 2023. E meta di e alivio fiscal aki tabata pa incentiva y activa construccion cu ta un sector cu ta lora e economia di Aruba. Banda di esaki, e rebaho den impuesto di importacion ta yuda tambe pa trece un tiki alivio pa e subida mundial di prijs di material di construccion.
Cambio den ley di comision di divisa pa exonera Estado Hulandes
Un otro cambio cu mester aprobacion di Parlamento, ta e cambio di e ley di comision di divisa pa exonera Estado Hulandes di paga ‘deviezenprovisie’ na momento cu ta transferi sosten di likidez pa Aruba, ta haya pago di e fiansanan di Covid19 haci pa Aruba na Hulanda y na momento cu ta transferi fondo pa Aruba cubri fiansanan haci den exterior den 2021 y 2022. Pa ricibi e sosten di likidez y tur e otro fiansanan di Hulanda, Tesoreria Hulandes a habri un cuenta na florin pa Estado Hulandes na Banco Central di Aruba. Pa e cuenta aki ta otorga exoneracion di pago di comision di divisa. E exoneracion lo yuda Hulanda tene e gastonan di e fiansa abou pa nan y pa Aruba na momento cu mester paga e fiansanan aki bek haciendo uzo di e mesun cuenta special aki na Banco Central.
