Diaranson despues di merdia Gobierno di Aruba a tene un conferencia di prensa extra-ordinario. Esaki tabata relaciona cu e carta cu Caft a manda pa Conseho di Minister di Reino den cual nan ta conseha pa duna Pais Aruba un instruccion riba Presupuesto 2022.
Gobierno ta cumpli parcialmente cu conseho di Caft
Dialuna ultimo den un conferencia di prensa Minister di Finansa Maduro a trece dilanti cu Gobierno di Aruba no por cumpli cabalmente cu tur e recomendacionnan di Caft pa locual ta Presupuesto 2022, ya cu esaki tin consecuencia serio pa gobernacion y pa Pueblo. Na varios ocasion a brinda splicacion na Caft pa atende cu nan preocupacionnan, pero Caft no a keda satisfecho y pesey a opta pa escala esaki na nivel di Conseho di Minister di Reino.
Recomendacion pa instruccion
Caft a manda su recomendacion na Conseho di Minsiter di Reino pa duna Aruba un instruccion riba Presupuesto 2022. Dado caso cu Conseho di Minister di Reino dicidi di duna Aruba un instruccion, Gobierno di Aruba di su parti lo sa di cana e caminda legal cu ta hiba pa haya un conseho na Raad van State. Ta un caminda conoci caba den Reino, ya cu poco tempo atras Pais Corsou tambe a cana e caminda aki cu exito.
Aruba lo surpasa e reto aki tambe
Minister Maduro ta trece dilanti cu ta den hopi awa bruto Gobierno di Aruba a bin ta nabega. Awo tin un otro mal tempo na caminda, un otro reto di gobernacion a presenta. No obstante esaki, Minister Maduro tin tur e confiansa cu nos bon Dios lo brinda nos su sabiduria, su forza y pasenshi pa logra e biaha aki tambe pa surpasa e reto aki na bienestar di Aruba.