Aruba Hotel & Tourism Association a revisa gobierno
di Aruba su plan di impuesto 2023 y ta sumamente preocupa pa e efectonan negativo cu esaki
por trece pa pais Aruba. Segun Presidente y CEO di AHATA, Sra. Tisa LaSorte, e plan ta un
“fundraiser mandatorio” cu ta recauda mas fondo di tur esnan cu ya ta cumpli cu impuesto.
Aunke cu e anuncio di gobierno falta hopi detaye y no ta duna bista completo riba su efecto,
AHATA ta desea di splica e preocupacionnan di mas grandi relaciona cu e informacion
disponibel:
E enfasis di gobierno ta robes: ta hisa entrada di gobierno pa sostene un instituto
ineficiente door di di cobra mas y pone mas peso financiero riba nos comunidad, en bes
di baha gasto gubernamental structuralmente, crea mihor eficiencia, y implementa un
plan agresivo pa hisa cumplimento di impuesto den e grupo grandi cu no ta paga y
cumpli cu nan deber.
E plan di impuesto ta hisa gasto di compania cual lo resulta den prijs mas halto y costo di
bida mas halto pa comunidad.
E elementonan di compensacion (por ehempel: baha loonbelasting) ta masha tiki
compara cu e cantidad adicional di impuesto tur hende lo paga.
Prijs mas halto por resulta den menos consumo di residente y di turista. E ora e
fondonan extra cu gobierno a calcula cu nan lo ricibi, no lo resulta.
Un di e elementonan di mas dañino pa compania den e pakete di impuesto nobo ta e
limite riba devaluacion di propedad inmobil. Esaki ta afecta e entrada di un compania
drasticamente. Un decision asina ta core cu inversionista en bes di atrae inversionista.
E prijsnan mas halto hunto cu e problema existente den distribucion global lo keda
causa mas inflacion.
Ta di lamenta cu sector priva, incluyendo AHATA, consistentemente a ofrece pa participa den e
proceso di crea un reforma fiscal efectivo pa Aruba, pero cu gobierno ta nenga di acepta e
expertisio y ayudo. E falta di transparencia y inclusion ta trece su consecuencianan negativo pa
henter comunidad.