BonaireInternacional

Brekmentu fuerte ta kondusí na flètayer riba avion di EZ Air

Ez Aire

Riba djamars atardi buelo 7Z 671 di EZ Air a hañele konfrontá ku un situashon kaminda e pilotonan mester a ehekutá un prosedura pa baha e avion na un manera seif. Ounke e pilotonan a apliká e prosedura korekto, esaki a kondusí na un situashon ku mester a brek mas fuerte ku normal, despues ku e avion a baha riba pista. Despues ku e avion a kore yega plataforma, a konstatá ku e tayernan di e tren di aterisahe tabata baha lentamente i finalmente a keda sin airu. Esaki a pone ku e avion no por a sali bèk pa sigui ku buelo pa Aruba i Kòrsou. Direktor di EZ Air, René Winkel ta bisa ku, kontrali na loke a sali inisialmente den medionan di prensa, no ta asina ku e tayernan a rementá. “Den kaso ku un òf mas tayer rementá, e avion no por move mas i mester keda para riba e pista. Esaki sinembargo no ta loke a sosodé den e kaso aki. E avionnan Saab aki tin un mekanismo di seguridat, ku ta laga e tirenan baha di forma gradual i kontrolá ora e temperatura di brek ta subi muchu haltu. Esaki ta un sorto di fius, ku na Ingles yama un fusible plug. Na momentu ku e temperatura subi, e fius ta dirti pa e airu por skapa for di e tayer pa asina evitá un situashon potensialmente peligroso”. Pasaheronan di e buelonan pa Aruba i Kòrsou mas lat a wòrdu buská pa otro avion di EZ Air, pa hiba nan pa nan destinashon. Departamentu tékniko di EZ Air a yega ku e mesun buelo aki, pa kuminsá remplasá e tayernan ku a baha. Despues di esaki, lo hiba e avion e base di mantenshon, pa duna un inspekshon kompletu, promé ku hinka esaki bèk den operashon. Winkel ta bisa ku e ta lamentá ku pasaheronan di e buelo en kestion por a spanta dor di e maniobra, pero ku e pilotonan a reakshoná di un manera adekuá. “Dor di e manera ku nan a reakshoná a evitá un situashon fèrfelu ku por a kondusí na daño na e avion òf un situashon peligroso. Lógikamente nos ta pidi nos diskulpa pa kualke inkonvenensia kousá pa nos pasaheronan”, asina Winkel a klousurá.

Related posts

Konsehal Daisy Coffie na final di e promé kuartal di 2021: Trabou di un miembro di Konseho Insular ta multifasétiko i dinámiko

EA News Author

A finalisá proseso pa yega na partner preferí ku kual lo kuminsá negoshá

EA News Author

Bonerianonan no ta contento nan ta sinti nan ta perdiendo nan Boneiro

EA News Author

Leave a Comment

Whatsapp Message