Dia 18 di yüli Boneiru ta yama bon biní na e promé barku for di Venezuela

Dia 18 di yüli 2023 t’asina leu i Boneiru por yama bon biní na e promé barku for di Puerto Cabello. E merkansia ku nan trese no ta destiná pa benta lòs den haf. Empresanan lokal ku ta disponé di e pèrmitnan nesesario pa esaki ta importá e merkansianan akí. Riba e punto akí no a bini kambio kompará ku e situashon promé ku a sera frontera ku Venezuela.

Pa basta tempu kaba Boneiru ta sperando riba e barkunan for di Venezuela ku bèrdura, fruta i material di konstrukshon. Na aña 2019 Venezuela a sera frontera via laman ku Boneiru. For di 3 di aprel 2023 a habri esaki atrobe. Ku entusiasmo diputado Jolinda Craane ta spera binida di e promé barku venesolano. Entidat Públiko Boneiru ta traha huntu ku e outoridatnan konserní pa hasi esaki posibel. ‘E hafnan di Tucacas i Puerto Cabello ku semper a duna servisio na Boneiru, tabata konfrontando algun desafio,’ segun Jolinda Craane, e diputado ku ta enkargá ku asuntunan ekonómiko. ‘Awor akí nan ta hasiendo e preparashonnan pa kuminsá atrobe ku e tráfiko marítimo entre Venezuela i Boneiru.’

Na aña 2019 Venezuela a sera frontera. Seguidamente e islanan ABC a sera frontera pa motibu di e vírùs di corona. Jolinda Craane: ‘Durante e lunanan tras di lomba Entidat Públiko Boneiru, ministerio di Asuntunan Eksterno, ofisina di haf, e kwartiermaker di ekonomia, duana i agensianan lokal a hasi e preparashonnan nesesario. Nan a traha huntu ku outoridatnan venesolano pa hasi komèrsio atraves di laman posibel atrobe. Si bo wak e eksperensianan na Kòrsou i Aruba, nos por spera ku na Boneiru tambe e produktonan lo ta mas barata.’

Diputado Jolinda Craane ta mira apertura di frontera via laman komo un paso importante pa habitantenan i mundu empresarial di Boneiru. ‘E barkunan ta sòru pa un oferta mas grandi di bèrdura, fruta i material di konstrukshon. Esaki ta sòru pa preis mas abou i ta kontribuí na e esfuerso ku Kolegio Ehekutivo ta hasi pa sostené forsa di kompra di nos konsumidónan. E abastesimentu for di Venezuela ta komplementá e oferta aktual na Boneiru. Esaki ta brinda sierto oportunidatnan pa doñonan di tienda lokal i pa importadónan.’