Riba Dia internashonal di Diabétis 2020 diputado di Boneiro Nina den Heyer ta yama un pabien na tur ku ta traha den enfermeria i otronan ku ta kuida un persona ku tin e malesa akí. Den Heyer ta mustra ku e ta agradesido pa e kontribushon ku nan ta duna tambe pa prevení diabétis.
Ta selebrá Dia di Diabétis rònt mundu riba 14 di novèmber. Riba e dia ei ta pidi mas atenshon i komprenshon pa diabétis. E aña akí e tema ta ‘ E enfermera i diabétis’. Enfermeranan tin un papel importante pa guia i sostené personanan ku ta diabétiko. Ta enfermeranan ta siña pashènt kon dil ku e malesa i sostené nan den esaki pa evitá ku nan salú ta bai patras.
Diabétis ta un malesa króniko ku mas i mas hende ta sufri di dje. Den boka di pueblo ántes tabata yam’é suku. Na Boneiru tin hopi hende, tantu hende grandi komo mucha, ku ta diabétiko. Sobrepeso ta e motibu prinsipal di diabétis tipo 2. Ta p’esei departamento Salubridat Públiko di Entidat Públiko Boneiru (EPB) huntu ku mas sosio ta boga pa mas atenshon pa biba un bida salú. Pa esnan ku for di aworakí sa ku nan ta diabétiko ta importante pa nan sigui mantené nan mes na nan plan di kuido ku nan a palabrá ku nan dòkter.
Públiko general mester siña hopi ainda di diabétis. Ku konosementu por sostené e enfermeranan den e kuido ku nan ta duna na personanan diabétiko. Ta sumamente importante pa keda duna lès di prevenshon. Enfermeranan por hasi un diferensia grandi pa diabétiko.