Na aña 2024 Boneiru a yama bon biní na un
kantidat remarkabel di 182.181 bishitante stayover, i ku esaki a surpasá e
rekòrtnan anterior di aña 2023 (169.706 bishitante), aña 2022 (169.200 bishitante) i
aña 2019 (157.000 bishitante). E logro nobo akí ta representá un kresementu di
16% kompará ku e nivel di promé ku e pandemia na aña 2019 i un subida di
7,35% kompará ku aña 2023.
Tourism Corporation Bonaire (TCB) a pone un meta di 180.000 bishitante pa aña
2024 a base di e Plan Maestro Stratégiko pa Turismo di aña 2017. E echo ku nos
isla a surpasá e meta akí, ta suprayá e kresementu kontinuo di turismo na Boneiru
pa e di kuater aña konsekutivo.
Informashon demográfiko di bishitante
Na aña 2024 Boneiru a yama bon biní na un variedat diverso di bishitante. E
bishitantenan for di Hulanda a forma e grupo mas grandi, esta 45% di e kantidat total
di bishitante. E bishitantenan for di Merka a sigui ku 25%, miéntras e bishitantenan
for di Kòrsou a representá 13% di e total. Den un grado importante bishitantenan for
di Alemania (2%), Aruba (2%), Canada (3%) i Bélgika (1%) tambe a duna un aporte.
Luna di desèmber 2024 a konosé e kantidat mas haltu di bishitante pa luna, ku
19.522 yegada, di kua 35% tabata prosedente di Merka. E buelonan nobo di JetBlue
ku a ranka sali dia 5 di novèmber 2024 a influensiá e oumento akí
konsiderabelmente.
E tendensianan pa loke ta trata estadia i akomodashon turístiko
Luna di desèmber 2024 a registrá tambe e durashon promedio di estadia mas largu,
ku bishitantenan ku a keda en total 198.595 anochi na nos isla. Segun kalkulashon
bishitantenan a keda en total 1.764.836 anochi na Boneiru, un promedio di 9,8
anochi pa kada estadia, loke ta nifiká un oumento di 5% kompará ku aña 2023
(1.674.163 anochi).
Bishitantenan ku ta bini bèk a hunga un ròl krusial den Boneiru su éksito, ku 56% di
e turistanan ku a bishitá nos isla anteriormente, miéntras 44% a permanesé pa
promé biaha na nos isla.
E metanan i preferensianan di nos bishitantenan
E motibunan mas prinsipal pa bishitá Boneiru tabata vakansi (54%), siguí pa
sambuyamentu (13,5%), negoshi (7,4%) i bishita na amigu i famia (8%).
E bishitantenan hulandes a bini Boneiru prinsipalmente pa vakansi (67%) i
nan a keda un promedio di 12 anochi. Mayoria di e bishitantenan hulandes a
bini for di Noord-Holland, Zuid-Holland i Noord-Brabant. Nan demografia di
edat ta mustra un representashon signifikante den e gruponan di edat di 55
pa 64 aña (21%), 45 pa 54 aña (18,9%) i 25 pa 34 aña (16,2%).
Kontrali na esaki, e bishitantenan merikano tabata repartí den un forma
mas uniforme entre sambuyamentu (47%) i vakansi (39%), ku un promedio di
estadia mas kòrtiku di 7.9 anochi. Nan a bini prinsipalmente for di Florida,
New York, Texas, California, Georgia, Pennsylvania, North Carolina,
Colorado, Massachusetts i Virginia. Nan demografia di edat a indiká un
presensia signifikante den e kategorianan di edat di 55 pa 64 aña (23%),
65 aña bai ariba (19,2%) i 45 pa 54 aña (19,7%).
*E bishitantenan for di Kòrsou a keda mas kòrtiku, un promedio di 4,2
anochi, ku negoshi (27%), vakansi (22%) i bishita na amigu i famia (14%)
komo e motibunan di mas importante pa nan estadia.
For di e preferensianan pa akomodashon a resultá ku 43% di e bishitantenan a
skohe pa hotèl òf risòrt, siguí pa 12,5% ku a keda den apartamento, 7,5% ku a
skohe pa vila i 9% ku a skohe pa keda serka amigu òf famia.
Satisfakshon di bishitante i perspektiva pa futuro
TCB su enkuestanan di salida a mustra un reakshon sumamente positivo di e
bishitantenan. 93% di e bishitantenan a indiká ku nan lo rekomendá Boneiru serka
otro hende, 92% a evaluá nan estadia komo ekselente i 90% a indiká ku sigur nan lo
bishitá nos isla un biaha mas.
Elesiër Angel, direktor statutario interino di TCB, a ekspresá su orguyo ku sektor
turístiko di Boneiru, bisando: “Nos ta orguyoso ku Boneiru su sektor turístiko no
solamente ta rekuperando, pero ku aña tras di aña e ta surpasá nos ekspektativanan
tambe. E kolaborashon entre sektor públiko i sektor privá tabata instrumental pa nos
por a alkansá e logro akí. Nos kompromiso ku kresementu sostenibel i mehorashon
di eksperensia di bishitante ta keda firme, miéntras nos ta wak padilanti den
direkshon di un aña ku atrobe ta hopi prometedor.”
E éksito di aña 2024 ta aksentuá Boneiru su resiliensia i efektividat di
kolaborashonnan stratégiko. TCB lo sigui traha huntu ku stakeholdernan pa
engrandesé e forsa di atrakshon di nos isla i pa garantisá kresementu sostenibel den
e añanan binidero.