Ta para scirbi den Efesionan 4:31-32 .Laga tur amargura, furia,rabia, griteria,y calumnia wordo kita for di boso, hunto cu tur malisia, Y sea carinjoso cu otro,misericordioso, pordonando otro,mescos cu Dios den Cristo tambe a pordona boso.
E asunto di cana cu un curason yen di rabia riba otro, e asunto di no kier pordona, e asunto cu ta pordona pero no ta lubida, e asunto cu no ta pordona di curason, ta backfire pa tur hende, y ta haci danjo serio mental y fisicamente.
Rencor y amargura ta produci atake di ansiedad, pasobra e diabel ta asina mentiroso cu e ta hinca den curason di hende pa nan desea malo pa otro of haci malo pa otro den scondi y ora nan mira cu e persona cu nan ta desea di mira malo, no ta bira malo, nan ta drenta ansiedad, pasobra nan deseo no a wordo cumpli.
E situacion di salud mental ta alarmante, especialmente ora hende ta kere cu tur cos ta remedi y terapia y lubida riba e poder di Dios.
Un hende amarga por contamina henter un cas, henter un compania, y hasta un iglesia, pasobra den caso si e ta lider, e ta sembra amargura den e congreacion, y nos tin cu tene cuenta cu rencor y amargura ta wordo considera como cancer spiritual.
Y nan no ta disparce si no tin arepentimento, pidimento di pordon, reconciliacion y restauracion, pasobra hende mester sinja pordona, y laga los.
Tin hende ta biba cu e pensamento cu nan tin di tene otro abao y e otro no por crece, sin nan aprobacion, y ora esey no sosode nan curason ta bira amarga.
E asunto aki ta birando serio pasobra hasta bao di hobennan amargura ta creciendo, si nos wak cuanto, pleito y rabia tin bao di hubentud, nos por comproba esey.
Hende amarga ta causa pleito constantemente sin ningun motibo.
Amargura ta pone hende pensa malo y ofende otro.
Rencor y amargura ta causa division tur caminda.
E falta di pordon creciente ta afecta mente di hopi hende, especialmente di muchanan cu no por compronde con nan mayornan no por pordona otro y biba na pas cu otro, pa asina tin felicidad den cas.
Hopi famia ta kibra, y tin hopi hende cu ta biba riba caya, no solamente pa motibo di adiccion, pero pa motibo di duele ,falta pordon,rencor y amargura, porta di cas a wordo sera pa nan, y nan no por bolbe bek serca famia, pasobra no tin pordon.
Rond mundo nos ta mira vengansa y hasta amargura politico ta draai rond, si nos tene cuenta cu e asunto di preso politico, nos ta ripara con amargura ta hasta ta kita libertad di otro.
Ta un gran berdad cu nos mester busca e solucion pa tanto amargura cu ta reina, pa nos por tin mas, amor pa otro pasobra e palabra di Dios ta bisa den Hebreonan 12:1 Aspira pa tin pas cu tur hende y santificacion, sin cual ningun hende lo mira Senjor.
Caminda tin pleito, amargura y rencor no tin pas, hende cu no kier pordona, nan relacion cu Dios ta kibra, pasobra palabra di Dios ta bisa ,si bo no pordona bo prohimo Dios tampoco lo pordona bo ( Mateo 6:14)
Y si bo no por stima e ruman cu bo ta mira, con bo por stima Dios cu bo no ta mira.
Ta tempo pa tur hende realisa cu Dios a pone pordon como remedi spiritual pa asina hende su curason por wordo sana.
Pordon ta kita carga , for di nos mes, pasobra e ta demostra cu nos ta stima Dios.