Tanto gobierno como coalicion NO kier duna informacion kico ta consecuencianan di e consensus rijkswet Hofa pa nos autonomia!
Di luna di januari 2025 fraccion di MEP ta wardando pa hiba un debate publico den parlamento riba e tema di rijkswet. Lunanan a pasa y te dia 29 augustus 2025 (8 luna despues) presidente di parlamento a yama e reunion di rijkswet. Pa nos sorpresa e reunion aki a wordo cancela despues di algun minuut cu e pretexto cu parlamento mester di tempo pa bay revisa y lesa e rijkswet Hofa pa despues e debate tuma lugar.
Loke a sosode e dia aki y cu e consensus rijkswet Hofa ta anti constitucional y anti democratico. Raad van State tawata hopi cla den su conseho y a bisa cu ora islanan den reino ta trata un consensus rijkswet, e gobierno mester presenta e proposicion di e rijkswet na parlamento prome cu esaki wordo manda pa conseho di minister di reino. Na Aruba e gobierno di Avp-Futuro a “bypass” parlamento, NO a presenta e ley di consensus Hofa aki ningun dia na parlamento di Aruba y a manda esaki pa conseho di minister di reino!
E acto di gobierno aki ta condenabel paso nan a falta respet pa e organo di mas halto y nan a kita derecho di parlamento pa trece cambio den e ley Hofa. Awor aki parlamento ta “buitenspel” y nos NO por trece ningun cambio mas den e rijkswet Hofa. Un rijkswet cu segun profesornan hulandes ta mina y kita nos autonomia. Un rijkswet cu nunca mas nos no ta sali for di dje, un rijkswet caminda gobierno di Aruba ta accepta pa nos wordo trata desigual cu islanan den reino hulandes. Un consensus rijkswet cu ta bay kita un parti grandi di nos status aparte, un rijkswet cu na final di dia ta kita nos Libertad.
Ta insolito pa pensa cu tin politiconan cu kier entrega y bende nos pais pa un sakito di placa. Ta mas insolito pa pensa cu nan kier entrega nos finansas publico, nos autonomia financiero siendo cu aki 5 aña caba nos debe di pais a baha bao di 50%! Aruba tin supervision financiero ancra den e landsverordening financieel toezicht, Aruba ta cumpliendo cu tur e normanan, Aruba ta pagando su debenan cu Hulanda y ya caba nos debe a baha cu 50%! Bisando esaki no tin ningun motibo valido y ningun hustificacion pa accepta e rijkswet Hofa.
Tristo ta cu gobierno y coalicion ta coriendo pa e debate publico, no kier duna informacion, no kier ta transparente y ta sconde pa pueblo. Si e rijkswet Hofa tin asina hopi beneficio pa pueblo pakico nan NO ta sali splica esaki? E pregunta principal ta keda, dicon Aruba mester accepta e Consensus Rijkswet Hofa?