Ultimo a tuma lugá e promé reunion komo parti di inisio di proseso pa vishon i koperashon entre e islanan Aruba, Sint Maarten, Boneiru, Saba, Statia i Kòrsou den Acoya Curaçao Resort, Villas & Spa. Minister di Salubridat, Medio Ambiente i Naturalesa drs. Dorothy Pietersz-Janga tabata e anfetrion. Dutch Caribbean Visioning Process (DCVP) ta enserá koperashon entre e islanan menshoná riba nivel di agrikultura, krio di bestia i peska.
Ku firmamentu di e deklarashon aki e islanan ta bai di akuerdo pa formalisá e DCVP komo inisio pa prepará i yega na un Memorandum of Understanding ku por keda firmá dor di tur e islanan na Mart 2023 na Aruba. Esaki ta enserá ku islanan ta komprometé pa studia e efektividat di un koperashon pa e sektor primario i kompartí práktika (best practises) i enseñansa ku otro. Ta importante pa enduresé lasonan i promové seguridat i praktikanan di bon agrikultura ku otro. E islanan por konta ku sosten i koperashon ku Rijksdienst voor Ondernemend Nederland (RVO).
Dia di 17 di òktober ultimo a tuma lugá un field trip kaminda a bishitá e.o. Maneho di Agrikultura i Bestia (ántes LVV), Soltuna, Kunuku Kitchen, M.J. Farm i Hòfi Cas Còrá i vários presentashon e.o. BonFresh i Kolektivo. Durante di djamars i djárason partisipantenen a tuma parti na un Open Space Technology i a finalisá den un World Café ku diferente palabrashonnan i puntonan di interés mutuo. Mas ku bienti sinku persona inkluso konsehero i representantenan a partisipá na tres dia intensivo di reunion.
Na final di e enkuentro Minister di Transporte, Integridat, Naturalesa i Asuntu di Grandinan sr. Ursell Arends di Aruba i Minister di Salubridat, Medio Ambiente i Naturalesa drs. Dorothy Pietersz- Janga di Kòrsou a firma un deklarashon pa sigui promové koperashon entre e islanan den presensia di sr. Derrick Simmons, Island Commissioner di Statia i sr. Rolando Wilson, Commissioner di Agrikultura di Saba.
