Tourism Corporation Bonaire (TCB) a organisá su promé Taste of Bonaire di e aña akí. E evento a tuma lugá riba djasabra 28 di yanüari 2023 den Parke Wilhelmina for di 18:00 or te 23:00 or den un ambiente fantástiko i e tabata dediká na Famia Real.
E evento tabata bon bishitá i nos komunidat boneriano a mustra su hospitalidat na tur nos bishitantenan. E programa tabata yená ku músika i vários artista i tabatin diferente stènt ku kuminda lokal i internashonal. E gruponan musikal Tutti Frutti i Foyan Boys tabata presente pa alegrá e anochi. Den e parti di show, dediká na Famia Real, tabatin aktuashon di All Star Dancers, Grupo di Maskarada, Youth Folkloric Dancers, Bonaire Folkloric Dancers i Brassband The Boys. Famia Real a haña oportunidat pa purba diferente kuminda lokal, partisipá na nos weganan tradishonal, wak nos shownan folklóriko i baila huntu ku e públiko.
