Minister Glenbert Croes: Pronto Aruba lo conoce un rebaho den prijs di awa y coriente

“Comunidad completo por tin mi compromiso, como Minister di Energia, cu awa y coriente lo baha bek”

Diamars mainta, durante conferencia di prensa, Minister di Energia Glenbert Croes a informa comunidad di un solicitud cu su persona a haci na e companianan estatal, WEB, Utilities y Elmar, pa bin cu un proposicion pa cu rebaho den e prijs di awa y coriente. Minister Croes a indica cu el a papia di e tema aki caba cu Minister di Economia Geoffrey Wever y tambe cu e otro ministernan durante reunion di Conseho di Minister. 

Tambe Minister Croes a expresa cu gobierno ta comparti e preocupacion cu tin den comunidad pa cu e necesidad pa baha e prijs di awa y coriente y p’esey su persona a solicita un proposicion pa baha e prijs lo mas hopi posibel. Unabes e proposicion ta cla y e rebaho aki por wordo realisa, Minister Croes lo comunica esaki na gremionan sindical, comercial y comunidad en general. 

“Comunidad completo por tin mi compromiso como Minister di Energia cu awa y coriente lo baha bek.  Nos ta warda e proposicion di e companianan estatal pa wak con nos por haci esaki di un forma responsabel y den un tempo corto mirando e urgencia di e situacion. Loke ta dolor den bo cartera, ta dolor na cas y ta afecta bo yiunan y famia. Nos como gobernante mester busca tur opcion pa trece alivio mientras ta posibel di imediato.” Minister Croes a indica.