Minister Maduro y minister president Wever-Croes ta na Hulanda pa haya e claridad riba e financiamento di e debe cu Aruba a acumula pa surpasa e pandemia

E siman aki Minister di Finansa Xiomara Maduro ta hunto cu Minister President Evelyn Wever-Croes na Hulanda pa cuminsa trata e refinanciamento di e debe cu Aruba a acumula cu Hulanda pa asina nos pais por a surpasa e pandemia di Covid. E pandemia tabata tin un efecto devastador riba e economia di Aruba y tambe e finansa di nos pais. Hulanda a presta Aruba, Corsou y Sint Maarten e fondonan necesario pa surpasa e pandemia, y awo a yega e momento pa paga e debe aki bek. Pa Aruba ta importante pa por haya e claridad necesario di Hulanda bou ki condicion e pago di e debenan aki mester tuma luga.  Aruba ta e unico pais den Reino cu ta fia placa ariba mercado internacional y nos mester por brinda nos inversionistanan e claridad pa nan por mantene nan confiansa den e stabilidad financiero cu Aruba ta brinda nan inversion. Pa e motibo aki Minister di Finansa Maduro ta spera cu Aruba y Hulanda por hiba bon reunionnan den cual e claridad lo por bini pronto pa Aruba.