A detecta boto den awa teritorial di Aruba y despues di varios tiro a para boto cu 3 Venezolano

Diabierna ultimo Wardacosta, den bon colaboracion cu Cuerpo Policial Aruba Korps Politie Aruba, den oranan di madruga ta detecta un boto den awanan teritorial di Aruba. Tambe a pidi asistencia di e helicopter di KPA durante e accion riba lama. Pa a logra stop e boto, personal di Wardacosta a los na prome instante algun tiro di advertencia. Como cu e capitan di e boto no kier a duna oido na e diferente advertencianan di Wardacosta pa para e boto, e personal di Wardacosta a los tiro dirigi riba e motornan di e boto pa por obliga para esaki.  Despues di a logra intercepta e boto a haya a bordo 3 hende homber di e nacionalidad Venezolano. E capitan y su ayudante a wordo deteni pa traficacion di hende. Wardacosta a entrega e 3 homber nan na KPA y e caso lo sigui den investigacion.