Tourism Corporation Bonaire ta organisá e di kuater Taste of Bonaire

Tourism Corporation Bonaire (TCB) ta organisá su di kuater Taste of Bonaire pa e aña aki.

E evento lo bai tuma luga djasabra 12 di oùgùstus 2023 den Parke Wilhelmina for di 6 or di atardi pa 10 or di anochi den un tremendo ambiente ku e tema ‘Summer’. E Taste of Bonaire aki tambe ta relashoná ku klousura di vakansi.

E programa lo ta kargá ku músika, talento i lo tin varios stènt ku ta bende kuminda lokal i internashonal. Agrupashon musikal Krioyo JC & Friends lo bai ta presente pa animá e anochi aki. Pa duna e Taste of Bonaire un toke mas atraktivo den e parti di show lo bai tin un tremendo show di baile, presentashon di kantidatanan pa Miss Teen Bonaire i DJ Roch. TCB lo bai duna rekonosementu na e gruponan di Special Olympics, Arte di Palabra i selekshon di baseball U8 Pony league.

Nos kier a ekstendé un invitashon na pueblo di Boneiru i tambe na tur nos bishitantenan pa bin pasa un ratu ameno huntu ku nos diasabra 12 di oùgùstus 2023 na e di kuater Taste of Bonaire ku e edishon ‘Summer’ den Parke Wilhelmina.

Pa mas informashon por tuma kontakto ku TCB na telefon 717-8322 òf mail sr. Angelo Domacasse na angelo.domacasse@bonaireisland.com.