No menos cu 150 mucha lo haya aporte cu nan schoolgeld
Diadomingo 20 di augustus, 2023 Kiwanis Club of Palm Beach a tene su di 3
edicion di Ride4Kids riba careteranan di Aruba. Miembronan di e club y no miembronan a core hunto pa yega na e meta y conhuntamente cu Spin4Kids a crea fondo pa por yuda no menos cu 150 muchanan desafortuna paga nan schoolgeld.
Kiwanis ta para pa muchanan y manera tur actividad di FUNdraising di Kiwanis club of Palm Beach, tur fondo ta bai 100% bek den comunidad y en especial nos muchanan cu mester di dje. Manera ta costumber di Ride4kids, e fondo lo bai pa yuda muchanan paga nan schoolgeld pa asina mayornan cu tine duro no mester preocupa pa e mucha su educacion.
Ride4Kids
IPP Rothmar Coenraad a inicia e Ride4Kids 2:00 AM for di Bright Bakery rumbo Malmok cu e meta pa core 175 KM. Riba e ruta, gruponan di 150 KM, 100 KM, 75 KM y 50 KM a join y asina finalisa e Ride4Kids dilanti Kiwanis Club of Palm Beach na Neptali Henriquez Park. Aki ta caminda a haci e entrega di e cheque simbólico na representantenan di SKOA.
Spin4Kids
Pa 6:00 AM, Fk Roy Mezas a inicia e prome edición di Spin4Kids ariba e parking lot dilanti Kiwanis Club of Palm Beach na Neptali Henriquez Park. Pa 4 ora largo parti den block di 1 ora, e spinners bou guía di FLY Fit Studio Aruba cu nan 3 instructornan a sa di tuma y cumpli cu e reto. Nos mester menciona cu tur contribuyente cu a aporta na e bon causa, a goza bou di música y bon ambiente.
Un danki ta bai na e dos main sponsors Guardian group y tambe FLY Fit Studio Aruba pa kere den e proyecto aki y haci esaki un éxito atrobe. No por lubida di duna danki na tur
contribuyente cu a aporta na e bon causa aki den forma monetario y tambe den forma di logística. E lista ta largo y Kiwanis Club of Palm Beach lo duna nan un danki grandi riba nan Social Media paso ta hunto so por haci un evento asina exitoso caminda na final di día, e muchanan ta sali gana.
