Directie Infrastructuur en Planning (DIP) ta contento di por anuncia cu riba dia diaranson dia 17 di januari, a caba di bel tur esunnan cu ta bini na remarca pa haya un kavel sea riba Vondellaan of riba L.G. Smith Boulevard. Tabata tres dia intenso di haci yamada y pa haya e peticionario na liña. Awo cada peticionario lo sigui atende cu nan peticion na DIP pa por haya e derecho riba precario den nan man.
Manera tur aña, a selecta e ganadonan por medio di un sorteo publico den presencia di notario. Anteriormente tabata publica e lista oficial di ganadonan, incluyendo nan nomber y adres. Pa proteha privacidad di e peticionarionan a dicidi di implementa un cambio den esaki.
Directie Infrastructuur en Planning (DIP) ta consisti di 55 empleado, cu diariamente ta procesa 16 tipo di peticion pa tereno residencial y comercial. Ta pasa mas of menos 200 akte di tereno residencial y 25 akte di tereno comercial pa aña. Henter e portfolio di productonan na DIP ta encera mas of menos 400 akte na notario pa aña.
Pa mas informacion ta invita interesadonan pa download e maneho di Kavel for di www.dip.aw.