Aruba Bank ta orguyoso di anuncia su patrocinio di e buki nobo pa muchanan “Rene su dushi wega” scirbi pa Ruthy “Lady Ruth” Vrieswijk-Bergen. E buki aki lo ser reparti entre scolnan basico pa alumnonan di tercer klas pa asina inspira lectornan chikito y promove lesamento riba nos isla.
E presentacion y bautismo oficial di e buki a tuma lugar na UNOCA dia 15 di januari 2025. E evento aki a celebra e lansamento di e buki, scirbi pa captura e imaginacion di mucha mientras ta stimula e amor pa lesa. Esnan presente tabata tin e oportunidad pa topa cu e autor y pa asina haña su firma den nan buki.
E iniciativa aki ta cuadra cu e compromiso di Aruba Bank cu ta kere den e desaroyo di lesamento y educacion den nos comunidad. E banco ta kere cu invercion den e educacion di nos muchanan ta un invercion den e futuro di Aruba.
E donacion di Aruba Bank lo percura cu alumnonan di un scol basico na Aruba por tin acceso na “Rene su dushi wega”, cu ta conta un historia inspirante tocante e felicidad di un mucha su infancia y balornan. E buki lo ta disponibel tambe pa cumpra den “boekhandel” nan rond nos isla.
