Diabierna siman pasa nos ta continua cu tratamento di presupuesto di Pais Aruba pa aña 2025. Un presupuesto prepara y presenta pa Gabinete Wever-Croes pero cu continuacion di su tratamento a keda defendi pa Gabinete Croes-Eman.
Na mi opinion e situacion aki sigur tabata uno hopi peculiar. Banda di e echo cu apenas algun ora prome cu e reunion a inicia e gobierno nobo cu a huramenta dilanti di Gobernador y cu ta apenas e dia prome parti atardi partidonan Futuro y AVP a firma nan acuerdo di gobernacion. Un acuerdo cu como parlamentario via canalnan inoficial mi a ricibi.
Sigur durante e reunion mi a haci uzo di e oportunidad pa felicita Gabinete Croes-Eman cu nan nombracion y a desea e gabinete completo hopi sabiduria y inteligencia. Y a enfatisa e echo cu mi ta spera cu enberdad nan por traha na bienestar general di nos pais y nos hendenan, y cu lo sa di aplica reglanan di bon gobernacion y un maneho financiero responsabel. Pasobra realidad ta cu mi ta spera di curason cu nan lo haya e forsa necesario pa por confia otro, laga bienestar general prevalece y no di partido y/of esun personal, y cu nan por laga nan pasado amargo atras y enberdad forma e equipo necesario pa por maneha e pais aki.
Como un ‘outsider’ ami como parlamentario y pueblo en general a experencia cu nan relacion a start hopi ‘stroef’. Ta di spera cu riba un tempo corto, contrario na e proceso di formacion, nan por acelera e proceso di mehoracion y fortificacion di nan relacion. Pasobra awor nan mester cuminsa traduci palabranan bunita den realidad.
Riba tereno financiero Gabinete Wever-Croes a laga hopi placa den caha pa nan por cristalisa nan promesanan. Ta keda na pueblo pa keda skerpi cu e cumplimento di parti Gabinete Croes-Eman awor.
Ya a sali na cla durante e reuniona aki cu nan no lo cumpli cu e aumento di pensioen cu Afl. 700 den 100 dia mas. Tambe nan a tuma e decision pa kita e posiblidad pa FCCA por haya un fiansa di Gobierno di 17 miyon na interes abou pa por bin cu 150-200 cas social y Afl. 2.7 miyon pa yuda FCCA cu suma di huur di cas. Banda di e tristo realidad cu mediante e nota di cambio presenta pa Gabinete Croes-Eman a corta den servicio y producto, cual ta nifica entre otro (tin mas) un recorte di: 1.4 miyon den Turismo y Salubridad Publico, 2.9 miyon den Enseñansa y Deporte y 6.2 miyon den Husticia y Asuntonan Social.