Battle of the Banks 2025, e competencia deportivo entre banconan na Aruba, ta sigui cu exito, union y energia positivo.
E evento ta organisa pa Aruba Bank, cu meta pa fortalece laso entre empleadonan di sector bancario den un manera saludabel y dibertido en conexion cu nan celebracion di 100 aña.
E prome evento a tuma luga durante e prome fin di siman di mei na Eagle Bowling Palace, unda Caribbean Mercantile Bank (CMB) a sali como e gran ganador, mientras Aruba Bank a bai cu segundo lugar.
Den fin di siman pasa, riba dia 9 y 10 di mei, e segundo evento a tuma luga na Centro Deportivo Betico Croes, cu competencia di Volleyball.
Den un competencia yena di adrenalina y dushi ambiente, Centrale Bank van Aruba a sali vencedor, mientras Aruba Bank a tuma un vez mas e titulo di segundo lugar.
E proximo evento ta plania pa e weekend aki, dia 16 y 17 di mei, na Papaya Ranch, unda e banconan lo midi nan habilidadnan den deporte tradicional di Bolas.
Battle of the Banks ta un iniciativa cu ta promove union, salud y deporte den sector financiero, y Aruba Bank ta orguyoso di mira participacion di tur banco local.
