Diahuebs mainta, Prome Minister mr. Mike Eman, hunto cu sra. Julie Wever, Director Tecnico y Comercial y sr. Giovani Anthony, Director General y Financiero di Fundacion Cas pa Comunidad Arubano, a firma un MOU na MFA Noord. Cu e MOU aki, FCCA ta compromete cu Gobierno di Aruba, pa hunto percura pa e habitantenan den e casnan di pueblo, tin un luga digno, limpi y bon manteni.
Segun Julie Wever di FCCA, “e MOU aki ta e prome stap pa cera e lasonan cu Gobierno pa yuda drecha e barionan. E ta un meta cu nos a cuminsa ya caba ta traha riba dje pa drecha tur nos barionan. E strategia ta pa bay bek den e barionan cu ya ta existi y drecha esakinan, pone amenidadnan cu un hende mester pa por biba cu calidad den e barionan”. Sra. Wever kier a gradici gobierno pa kere den e strategia di FCCA pa drecha e barionan y pa tin e compromiso pa duna FCCA e sosten aki, paso sin Gobierno FCCA no ta logra su metanan.
Segun Prome Minister Mike Eman, “durante nos gobierno anterior, nos a renoba cierto barionan cu bo a mira un diferencia grandi manera Yuwana Morto, Yara y Pos Chikito complex cu tabata un ehempel, y e mesun concepto ey di renoba e barionan, duna e hendenan un miho calidad di bida, ta locual ta enfocando den e MUO aki”.
E mantencion y limpiesa di e barionan aki ta di sumo importancia y cu e MOU, Gobierno ta bira un partner strategico. Pa e plan no keda solamente riba papel, despues di a firma e MOU, Prome Minister a duna inicio na e prome Accion di Bario den Semeleerstraat na Noord.
Gabinete AVP-Futuro ta firme den su compromiso pa sigui traha pa un Aruba caminda tur ciudadano ta wordo scucha y nan bienester ta prioridad di gobierno. Hunto lo sigui traha pa oportunidadnan igual, bario sigur y desaroyo sostenibel, y percura pa tur hende tin un futuro digno pa nan mes y nan famia.
