Consehun Social Economico (SER) di Corsou a participa recientemente, riba 10 y 11 di april, den un tayer di dos dia organisa pa e Conseho Economico y Social di Republika Dominicana (CES) na Santo Domingo. Raúl Henríquez, director y secretario general di SER Corsou, a wordo invita pa e presidente di e CES dominicano, Rafael Toribio, pa fungi como orador den e parti internacional di e programa.
Henríquez a duna un disertacion tocante AICESIS (e asociacion internacional di consehonan economico y social) y, hunto cu representantenan di Guatemala y Spaña, el a elabora riba e rol di e consehonan di Caribe y Latino America den e asociacion internacional aki.
Den su intervencion, Henríquez a enfatisa un punto crucial pa Corsou: “Na 2026, un conseho economico y social no ta simplemente un asesor di e sistema democratico; e ta parti di loke ta mantene e sistema stabil.” El a señala cu economianan chikito y insular ta mas vulnerabel pa tensionnan geopolitico y interupcionnan den cadena di suministro. Den e contextonan aki, bon gobernacion no ta depende solamente di e decisionnan, sino di e autenticidad di e proceso di dialogo.
Pa Corsou, un di e lesnan mas importante tabata e reflexion di cierre di presidente Toribio, kende a subraya cu un conseho no por limita su mes na trece partidonan hunto pa dialoga, sino cu e mester fortalece su influencia y vigila structuralmente e cumplimento di acuerdonan. Pa SER Corsou, e invitacion aki a nifica no solamente visibilidad internacional, sino tambe un oportunidad pa alinea su mesun rol institucional pa medio di aprendisahe comparativo.