E proposishon ta enfatisá e impakto duradero di kolonialismo i sklabitut riba bida sosial, ekonómiko i kultural di nos komunidat, i ta bogá pa un komprenshon kolektivo di nos hisotria pa yuda den desaroyo di nos futuro.
Konteksto Históritiko: E proposishon ta resaltá e konsekuensia profundo di kolonialismo i sklavitut ku ta sigui afektá nos struktura sosial te awe. E ta argumentá pa e nesesidat di ataká e asuntu akinan ku akshon informá.
Relevansia di Reparashon: E proposishon ta diskutí e rekonesimentu kresiente di e nesesidat di reparashon i sanashon, ku a keda suprayá pa hopi di nos mes ilustrenan manera Doktoor Moises F. da Costa Gomez ku a habri porta pa outonomia, profesor defuntu Yandi Paula ku su analises di efektonan di sklabitut i kolonialismo den su tesis “From Objective to Subjective Social Barriers”, profesor Rose Mary Allen ku su tesis “Di ki manera? A Social History of Afro-Curaçaoans, 1863-1917”, dr. René V. Rosalia ku su tesis “Tambú; De legale en kerkelijke repressie van Afro-Curaçaose volksuitingen”, outornan manera drs. Charles Do Rego i Lionel Janga den “Slavery and Resistance in Curaçao, The rebellion of 1795”, drs. Richinel Ansano ku a dediká na reskate di nos Afro-Spiritualidat, Jean Henriquez, historiado i aktivista, ku a promové Museo Tula i Kas di Pal’i Maishi, artistanan manera defuntu dr. Ellis Juliana, poéta ku a konservá tantisimo artifakto di nos pasado, defuntu drs.Joycelin Clemensia, aktivista i Papiamentalista, defuntu Pacheco Dommacasé ku a yuda lanta nos for di soño ku su obra “Tula”, defuntu Ced Ride ku kansionnan manera “Buchi Fil”, drs.Gibi Basilio, poeta i aktivista, Rignald Ricordino, musiko ku e kantika “Tula warda”, tambuleronan manera defuntu Shon Cola, konservador di nos yerbanan Dinah Veeris MSc.“Remedi i kustumber di nos bieunan” i ainda nos mester rekonosé muchu mas persona ku a dediká nan mes na nos emansipashon. Den region, Caricom a sali dilanti ku un’plan di 10 punto’ i mundialmente Nashonnan Uní a deklara un di ‘dos dekada internashonal pa hende di desendensia Afrikano’. Den Reino Hulandes, minister president di Hulanda i Rei Willem Alexander ekspresá un diskulpa públiko.
Ròl di Parlamento: E proposishon ta mustra riba e importansia pa parlamento pa tuma un ròl den área di dekolonisashon i reparashon, inkluíendo e nesesidat pa analizá e responsabilidatnan di e potensianan kolonial anterior.
Tareanan di Komishon Proponé: E komishon proponé lo ta enkargá ku hasi investigashon riba e impakto institushonal i sosio-ekonómiko di kolonialismo, duna rekomendashon pa reparashon i sanashon, habri archivonan relevante i mantené kontakto ku organizashonnan lokal, regional i internashonal relevante. Tambe traha riba konsientisashon públiko tokante e efektonan di kolonialismo i sklabitut i promové edukashon riba e tópikonan akinan na skol i den e komunidat.
Plan di Implementashon: E dokumento ta delineá un plan pa e aktividatnan di e komishon, inkluíendo fase di instalashon, investigashon, i reportá.