Don Ceder, miembro di Tweede Kamer pa e partido ChristenUnie, a expresa su preocupacionnan tocante e propuesta pa e Ley di Reino riba Hof van Rechtshandhaving (HofA). Durante un combersacion cu e partido politico Arubiano Eduard Pieters PPA, Ceder a enfatisa cu e legitimidad democratico di Parlamento di Aruba (Staten) no mag wordo poni na peliger pa motibo di intervencion for di Conseho di Minister di Reino.
Maske e texto definitivo di e ley no a yega Tweede Kamer ainda, ChristenUnie ta siguiendo e desaroyonan rond di HOFA hopi di cerca. E nucleo di e discusion ta e pregunta si e ley di reino nobo aki ta constitui un infraccion demasiado grandi riba e derecho di presupuesto di e parlamento Arubiano. “Nos ta puntra nos mes si esaki no ta afecta e legitimidad di parlamento pa stipula presupuesto demasiado hopi,” Ceder a declara. Segun e parlamentario, ta esencial pa Aruba mantene e mando riba su mesun kadersnan financiero.
Band’i e obheccionnan den contenido, tin critica tambe riba e procedimiento cu a wordo sigui. Tin señalnan cu e comunicacion entre gobierno di Aruba, parlamento y Conseho di Minister di Reino (RMR) a cana stroef. Ceder a priminti di tuma e señalnan aki seriamente asina cu e debate na Den Haag cuminsa.
“Ora nos trata un ley, nos ta discuti tur cos: e contenido, pero tambe e proceso. Pa nos ta esencial pa e camindanan democratico corecto wordo cana,” Ceder a splica.
E miembro di Parlamento Hulandes ta wardando actualmente riba e texto definitivo y e conseho corespondiente di Raad van State. Solamente a base di e documentonan ey, ChristenUnie lo duna un huicio final. Ceder ta puntra su mes abiertamente kico ta e urgencia actual di e ley di reino aki y si no por logra e obhetivonan stipula na un manera menos invasivo.
A pesar di e preguntanan critico riba e ley di reino, Ceder a papia cu elogio over di e relacion entre Hulanda y Aruba. El a describi e laso como uno “caluroso” y a elogia e independencia economico cu e isla a edifica desde su Status Aparte.
“Aruba a demostra despues di e golpi fuerte di e pandemia di COVID con resiliente su pueblo ta,” Ceder a bisa. El a subraya cu ta su responsabilidad pa, den cada trayecto di ley, considera e contexto y interesnan specifico di Aruba cautelosamente. El a conclui su mensahe pa e isla cu un saludo di speransa: “Sa cu for di Tweede Kamer nos ta purba pensa den e interes di Aruba. y ta espera di por bin bishita Aruba pronto atrobe.”