Aruba ta enfrentando un momento decisivo pa su futuro financiero. Segun declaracionnan recien di minister di finansas Geoffrey Wever, e pasonan cu Parlamento y Gobierno tuma rond di e Rijkswet Aruba Financieel Toezicht (RAFT/HOFA) lo determina si e pais por reduci drasticamente e pago di interes riba su debenan miyonario. Esaki so lo ta e parti positivo di e Rijkswet HOFA un bahada di interes riba debe di Pais Aruba, e resto ta condicionnan benifia pa Hulanda solamente.
Actualmente, Aruba tin un debe nacional cu ta surpasa e cifra di biyones di florin. Di e suma aki, un parti considerabel exactamente 916 miyon florin ta debi na e prestamonan ricibi durante e pandemia di COVID-19. E debe aki ta carga un tasa di interes hopi halto di 6.9%, locual ta representa un peso enorme pa e caha di Gobierno. Enbes cu Hulanda yuda Aruba den un tempo di Pandemia manera statuto ta indica , Hulanda a castiga Aruba y a trata Aruba contra di loke e statuto ta bisa y Hulanda mes no ta respeta e statuto.
E bentaha di e refinanciamento
E punto clave di e negociacionnan actual cu Hulanda ta e posibilidad di refinancia e 916 miyon florin aki bao di condicionnan hopi mas faborabel. Si logra un acuerdo, e interes lo baha di 6.9% pa aproximadamente 3.2%.
Pa e pueblo di Aruba, esaki no ta djis un cifra riba papel, e reduccion aki ta nifica un ahorro miyonario den gasto di interes. E placa cu no mester paga mas na interes por wordo inverti directamente den nos comunidad, sea den enseñansa, siguridad, salud of infraestructura, pero solamente si Hulanda duna ok pa por haci e inversionnan aki despues di e Rijkswet.
Rijkswet HOFA: E condicion fundamental
Sinembargo, e refinanciamento aki no ta bini sin condicion. Pa por haci uzo di e interes mas bao aki, mester tin un consenso politico riba e implementacion di e Rijkswet HOFA.
“Si nos no kier e Rijkswet, e ora nos no ta haya e refinanciamento, y nos no ta haya e placa cu nos por duna bek na nos comunidad,”Segun Minister Geoffrey Wever.
Sinembargo e porcentahe abou no ta wordo haya sin e Rijkswet HOFA , pero tampoco no tin garantia ora e Rijkswet HOFA pasa cu tur e rebaho , e placa cu supuestamente ta poni pa inverti , Hulanda ta duna OK cu Aruba por of mag di inverti den e comunidad manera Minister Geoffrey Wever ta indica.
E situacion ta simpel pero critico:
- Si tin consenso: Aruba ta refinancia e debe di COVID y seis otro prestamo grandi cu tin riba mercado Americano, logrando un alivio financiero structural.
- Si no tin consenso: E ley no ta pasa den Parlamento, e refinanciamento ta cay den awa, y Aruba lo keda obliga na paga e interesnan halto aki limitando e capacidad di Gobierno pa inverti den e bienestar di e ciudadanonan y Aruba ta keda cu su autonomia y cu un bon Maneho di un bon gobierno Aruba por Sali padilanti.
Decision den man di Parlamento
E futuro di e deal aki awor ta depende di e boluntad politico den Parlamento di Aruba. Sin e votonan na fabor di e ley local aki, e posibilidad di un miho maneho di debe ta core peligro, lagando e pais cu e peso di interesnan halto cu ta stroba progreso economico y social, Segun Minister Geoffrey Wever.