Despues cu Corte Supremo (Hoge Raad) a dicta e sentencia final den e caso Avestruz, e panorama politico na Aruba a drenta un fase di tension halto. Mientrastanto cu fraccion di AVP ta pidi “privacidad” pa nan colega parlamentario Stephany Sevinger, fuentenan interno ta indica cu e yiu muhe di e ex-minister condená ta eherciendo un precion fuerte pa logra un gratie pa su tata, Benny Sevinger.
E decision di Hoge Raad a nifica un golpi duro pa e partido berde, confirmando e condena contra un di nan figuranan mas influential den e ultimo decadanan. Sinembargo, e lucha no a termina eynan. Segun informacion cu a circula, tin un periodo legal di 9 dia caminda e condenadonan—Benny Sevinger, Leoncita Arends y Pieter Susebeek por presenta un peticion di gratie pa asina evita di drenta prison.
Precion den curason di AVP
Fuera di e comunicadonan oficial, e tension den seno di AVP ta bisto. Stephany Sevinger, kende awor ta ocupa un stoel den Parlamento, ta den un posicion clave pa presiona internamente. E argumento principal ta basa riba e lealtad cu Benny Sevinger a demostra pa añanan largo, unda el a fungi como un motor electoral y a yuda e partido crece via e mesun fundacion cu awe ta e base di su condena.
Den e pasionan di politica, hopi ta cuestiona e origen di e “opdrachtnan” den e tempo ey. Tin un sentimento cu hopi di esnan envolvi den e caso tabata mas liga na e amistad di e ex-prome minister, awe un biaha mas prome Minister Mike Eman cu nan ta liga na Sevinger mes, locual ta lanta preguntanan incomodo riba ken mester carga e responsabilidad final.
Fraccion di AVP ta pidi privacidad
Pa medio di un comunicado oficial, fraccion di AVP a reacciona riba e sentencia, purbando di mantene un postura di respet pa e Estado di Derecho, pero enfocando nan empatia riba e yiu muhe:
“Fraccion AVP a tuma nota di e sentencia den caso Avestruz. Nos ta expresa nos sincero empatia y apoyo na nos colega Stephany Sevinger y su famia. Nos ta respeta su privacidad y dignidad den e momentonan aki.” Asina e comunicado a indica.
Ademas, e partido a probecha pa pidi autoridadnan hudicial acelera otro casonan di presunto corupcion cu ainda ta pendiente, un movecion cu hopi ta mira como un intento pa desvia e atencion for di e realidad cu e di dos ex-ministernan di AVP mester bay sinta castigo.
E “Porta Legal” di Gratie
Prome cu a yega pa tuma e caminda di gratie a purba e caminda pa Enkel band, pero esaki ta un proceso relativamente nobo y e caminda ta dificil , pesey mes a opta pa e caminda di Gratie cu ta poniendo basta precion na e momentonan aki riba minister Arthur Dowers.
Un peticion di gratie ta wordo procesa door di Minister di Husticia. Gratie ta un instrumento extraordinario cu por reduci, cambia of elimina un castigo completo.
E situacion aki ta pone un peso enorme riba e dimension politico. Comunidad ta mirando esaki cu hopi skeptismo, interpretando e movecion aki como un intento desespera pa e condenadonan “get away” cu nan actonan. E pregunta fundamental cu ta keda riba mesa ta: lo tin boluntad politico pa hala un decision di e corte mas halto un banda?
Mientrastanto, e novela di corupcion mas grandi di e ultimo añanan na Aruba ta drenta su capitulo final, unda e linea entre lealtad familiar, precion politico y husticia ta birando cada bes mas fini.