Mas cu mey miyon florin di fondo publico ta bay perdi den container
Loke mester tabata un inversion importante pa futuro di deporte na Aruba, awor ta bira un ehempel cla di mal maneho y destruccion di capital. E proyecto deportivo multifuncional na Santa Cruz, riba tereno di Aruba Sport Unie (ASU), ta para completamente mientras mas cu mey miyon florin na material deportivo ta keda den container, deteriorando tur dia. Oposicion awor ta bati alarma y ta manda puntra e minister di Deporte si e no sa cu e ta responsable pa para e proyecto, pero tambe pa e deterioracion evidente di inversionnan publico para den e containernan.
Di desaroyo pa paralisacion
E proyecto, situa banda di Compleho Deportivo Betico Croes, tabata destina pa fortalece infrastructura deportivo di Aruba. Bou di gobierno anterior, recurso ya tabata asigna y material ya tabata cumpra. Sin embargo, e gobierno actual a dicidi di para e proyecto bou capa di investigacion, pero sin ningun splicacion cla na Parlamento o na pueblo. Tambe ta papia di hallazgonan arkeologico indjan, pero e tereno ta mas di 20 mil m². No ta realistico cu henter e tereno ey lo tin hallazgo indjan riba dje. Mas ainda, dicon ta laga e materialnan putri den e containernan?
Ta destrui bo placa sin worry y sin informa
E consecuencia ta pa ken e ora cu e materialnan caba di daña para eynan: pa minister o pa ASU? Containernan jena cu material deportivo ta bayendo den un mal estado, y balor di e inversion ta baha cu cada dia. Segun Tevreden, aki nos ta papia di destruccion directo di fondo publico—o den bon crioyo—placa di pueblo, bo placa!
No ta e intencion pa daña o stroba pa yega na e hallazgonan indjan. Pero despues di mas cu dies aña, ainda no tin ningun reporte definitivo, ningun accion cla, ni decision concreto pa coba o saca esakinan for di tera. Tampoco pa sera e tereno unda ta pensa cu nan ta y asina uza loke ta resta. Pesey e pregunta na gobierno ta uno fundamental: si esaki tabata un asunto arkeologico serio, con ta posibel cu gobierno no a duna claridad durante tur e añanan aki?
Un patronchi bon cla cu nos ta keda mira cu Gabinete AVP/FUTURO: retraso, falta di liderazgo y ausencia total di vision.
Ken ta bay carga responsabilidad?
E situacion ta lanta preguntanan serio tocante responsabilidad financiero y posibel responsabilidad legal. Ken ta responsable pa e hecho cu material paga cu fondo publico awor ta deteriorando? Cua medida a wordo tuma pa evita esaki? Y pakico ASU, como esnan encarga di e tereno, ta sigui wordo frena den nan plan di desaroyo? Tevreden ta indica cu e paralisacion prolonga no ta solamente mal maneho, pero por resulta tambe den responsabilisa e minister personalmente pa e daño causa.
Sector deportivo atrobe victima di capricho politico
Aruba ta luchando añanan caba cu falta di facilidadnan deportivo di calidad. Para e proyecto aki, locual por conduci na te hasta perde e materialnan aki, no solamente ta causa daño financiero, pero tambe ta frena directamente desaroyo di deporte y di nos hobennan na Aruba.
Esencia di e caso ta simpel: si gobernacion ta un continuacion, e ora no laga e placa inverti aki bay perdi asina aki. Gobierno tin di proteha e inversion y no paralisa net unda progreso ta necesario. Mientras tanto, a manda pregunta pa gobierno contesta pa asina Parlamento haya mas claridad. E proyecto aki lo keda un simbolo di con fondo publico ta wordo desperdicia y con sector deportivo ta sigui paga e prijs pa falta di capacidad politico. Esaki no ta un simpel retraso mas; esaki ta destruccion di capital, destruccion di oportunidad pa nos deportistanan, y destruccion di facilidad deportivo. Tur esaki ta responsabilidad di e minister!