En conexion cu Dia Mundial di Salud, Minister di Salud Publico, Desaroyo Social y Labor (VSA), Richinel Brug, ta curasha miembronan di comunidad pa tuma un momento pa refleha riba e importancia di salud y bienestar, y pa participa activamente den actividadnan cu ta fomenta un estilo di bida mas saludable.
Dia Mundial di Salud, cu ta wordo celebra anualmente dia 7 di april, ta sirbi como un recordatorio cu bon salud ta e fundamento di comunidadnan fuerte. Minister Brug a enfatisa cu pa mehora salud publico, esaki ta exigi e esfuerso colectivo di gobierno, profesionalnan di cuido di salud y e comunidad en general.
“Dia Mundial di Salud ta recorda nos cu salud no ta trata solamente di cura malesa, sino tambe di prevencion, concientisacion y e tomamento di decisionnan cu ta mehora nos calidad di bida,” Minister Brug a declara. “Como Ministerio, nos ta keda comparti e compromiso pa fortalece nos sistema di cuido di salud y promove iniciativanan cu ta sostene e bienestar fisico y mental di nos pueblo.”
Pa marca e ocasion aki, Collective Prevention Services (CPS), un departamento bou di Ministerio di VSA, ta organisa un evento special awe na e Vineyard Building. E evento lo ofrece informacion di salud, actividadnan di concientisacion y oportunidadnan pa publico interatuá cu profesionalnan di cuido.
Minister Brug ta curasha e habitantenan pa asisti y probecha di e recursonan y informacion cu ta wordo poni disponibel. “Mi ta curasha tur hende den nos comunidad pa pasa awe na e Vineyard Building y participa den e actividadnan organisa pa CPS. Eventonan manera esaki ta yuda eleva e concientisacion riba e importancia di mantene un estilo di bida saludable y pa tuma pasonan proactivo pa un miho salud,” e Minister a bisa.
Minister Brug tambe a probecha di e oportunidad pa felicita CPS y su personal pa nan dedicacion continuo den promocion di salud publico y nan esfuerso pa yega na e comunidad.