Tur hende tin dos pia, pero tur hende sa bon, bon cu ta dificil, casi imposibel pa cana den dos caminda, e wega di sirbi dos shon a sali na cla , y tur hende ta mirando cu no tin bienestar, tampoco crecemento den e asunto ey.
Bo no por cana robez y spera bondad, pasobra tur locual hende sembra, hende lo cosecha, scuridad nunca a trece cos nan bon, hasta ora nos mira tempo bira scur y cu weer ta cambia nos sa cu locual ta na caminda , no ta tur biaha ta awacero so,pero ta awacero acompana pa strena cu lamper, tin biaha rafaga di biento peligroso, cu por destrui propiedad y haci danjo na bida di hende.
Si nos a tende y ta mirando tempo trabahoso, tempo dificil, nos tin cu cuminsa pensa kico nos tin di haci , pa nos tin un refugio, un defensa, un caminda di sconde, un fuente di sabiduria cual ta firme, y decente, puro, sin mentira, y di hopi confiansa, pa asina nos por biba den trankilidad.
Despues di bisa Timoteo den 2 Timoteo vers 3 -5 tocante tempo trabahoso, Pablo ta pone bon cla den vericulo 10-14 tur locual mester wordo haci, pa asina nos por wordo protegi di e mal tempo, y ta splica mas dilanti cu ta solamente manera e palabra di Dios ta bisa nos por pasa den e tempo trabahoso.
Un cos ta masha importante pa hala mas serca Dios, y busca presencia di Dios pa nos bida, cual lo ta nos guia y nos speransa.
E palabra di Dios ta recorda nos cu nos mester somete nos mes na Dios y resisti e diabel y e lo huy for di boso, hala serca Dios, y E lo hala serca boso . ( Santiago 4:8).
Mi ta stima tur esnan cu ta stima mi, y esnan cu ta buscami cu diligencia lo hanjami ( Proverbionan 8;17).
Boso lo busca Mi y hanja Mi ora boso busca Mi cu henter boso curason. ( Jeremeias 29:13).
Senjor ta serca esnan cu ta sclama na dj’E, serca esnan cu ta sclama na dj’E di berdad.( Salmo 145;18).
Den presencia di Senjor tin, Speransa,Amor, Goso, Pas,Compasion,Forsa y Poder, Misericordia,Proteccion,Posibilidad, Gracia, Pordon y Fabor.
Ta solamente Cristo Hesus por bisa na nos tur:
Bin serca Mi tur cu ta cansa y carga y lo mi duna boso sosiego. ( Mateo 11:28).
Y awendia nos ta mira cu esey ta e gran remedi pa tur esnan cu ta cana bao di stress y depresion, poniendo nan salud mental na peliger.
Tur momento cu nos busca di Dios, y nos no duda den palabra di Dios, nos lo tin seguridad y sanacion, pasobra tur cos ta posibel pa esun cu ta kere, Hesus a bisa cu pa hende cos lo ta imposibel pero no pa Dios.
Ora bo recomenda un hende pa e busca Cristo Hesus den su bida, no ta religion, pero ta e relacion cu E unico cu por yude y sake for di e situacion amargo of perta cu e ta den.
Ora un hende bisa bo pa busca Cristo Hesus pa bo bida,ta pasobra e persona ey ta stimabo, y kier mira bo bon.
Lagami tende Bo misericordia den mainta, pasobra den Bo mi ta confia,sinjami e caminda cu mi mester cana, pasobra na bo mi ta halsa mi alma.( Salmo 143:8).
Ta tempo pa pone tur duda un banda, y firmemente, aserca e trono di Dios, pasobra serca Dios tin tur cos.