Dialuna merdia, Minister di Husticia, mr. drs. Arthur Dowers, a realisa un bishita di trabao na Centro Orthopedagogico (OC) na Dakota. E bishita a inclui un recorido duna pa e directora di OC, sra. Abigael Emmanual, cu a mustra e realidad preocupante den cual e facilidadnan ta operando actualmente.
OC ta forma un schakel profesional den e cadena di jeugdhulpverlening na Aruba. E centro ta ofrece, riba un manera metodico, tratamento y guia residencial pa hobennan cu problemanan psicosocial, cu e meta pa nan por siña habilidadnan esencial den tempo mas corto posible riba varios area di desaroyo. Na final di e tratamento, e hoben por sali di OC cu capacidad pa funciona independientemente den su hogar y/of den sociedad.
Minister Dowers, como Minister di Husticia, na 2014 a pone e prome piedra pa e construccion di e facilidad actual, y a expresa su preocupacion pa e manera indigna den cual e centro mester a opera durante di e ultimo 7 añanan. Segun e directora di OC, gran parti di e facilidad ta den estado di deterioro avansa: plafon cu ta lek awa, muraya cu humedad y schimmel presente casi tur caminda, bentananan kibra y mucho mas.
Ademas, tin houtluis cu a afecta e cashinan di cushina, cu ta exigi un reemplaso completo. Varios baño tin tuberianan cu ta lek den e murayanan, causando situacionnan no higienico ni sigur pa e usuario y personal.
Minister Dowers a condena e situacion aki cu ta e resultado directo di falta di inversion durante e gobierno anterior, den cual OC no a ricibi e atencion ni recurso cu ta coresponde pa su funcionamento optimal den e sistema di husticia hubenil.
Un centro cu e importancia di OC mester tin no solamente personal capacita y un direccion fuerte cu tey caba, pero infrastructura digno y sigur, tanto pa e muchanan cu ta haya guia como pa e profesionalnan cu ta traha cu dedicacion.
Minister Dowers a compromete su ministerio pa evalua e necesidadnan infrastructural, cu un plan pa restaura, reforsa y modernisa OC.
