Faltando menos cu un luna pa e evento di mas grandi pa e temporada di zomer, nos por conclui cu e expectativanan ta grandi. Ta trata aki di e Bright Summer Festival, cual lo tuma luga riba e dianan 9 y 10 di augustus y cual lo conta cu presentacionnan internacional di Kapo, Cultura Profética, Ir Sais, Jeon y hopi mas. Hopi persona tanto local como internacional a sigura nan ticket sea ta den e seccion general como tambe standing VIP.
E seccion di mesa ta sold out y e otro seccionan tambe ta mirando un benta hopi mas halto mirando cu hopi biaha na Aruba nos ta warda te na ultimo momento. Naturalmente mester corda cu mas cerca e fecha di e evento ta, mas halto e prijsnan tambe lo aumenta. Pa es motibo aki tambe ta recomenda tur hende pa cumpra nan ticket adelanta.
Comienso di luna e cantante KAPO, hunto cu Beéle, considera un di e expontenan mas grandi di e ritmo di Afrobeat Latino, a saca su album nobo. Cu un campaña di publicadad grandi rond mundo via Apple music, YouTube y Spotify e album a haya un acogida grandi, cu varios exito caba hunto cu Feid, Ryan Castro y otronan.
Su show na Aruba lo bay ta algo hopi bunita pa wak. Ta trata di un delegacion di 25 persona cu lo ta biahando pa Aruba, cu ta consisti di pianista, percusionista, guitarista, dj , 8 bailarin y team tecnico. Na e momentonan aki KAPO ta na Europa presentando na diferente pais. Su ultimo presentacion na Europa ta 3 di augustus pa despues e prepara pa bin Aruba.
Ta importante pa corda tur persona cu esaki ta trata di un ‘Beach Festival’ dus e area principal lo ta riba beach. Di e forma aki disfrutando di nos dushi naturalesa, pero naturalmente ta esencial pa cuid’e tambe. E area di cuminda cu diferente truck di cuminda y ‘food vendor’ lo ta riba e parti di asfalt.
Hopi ta esnan cu ya a cuminsa cumpra y/of bestel nan beach outfit pa e evento grandi aki unda ta spera bastante miles di persona.
E popular cante Ir Sais tambe ta forma parti di e festival, sinembargo e lo ta presentando pe e publico di e ‘Pier Party’ na Pelican Pier ariba diadomingo. Debi na capacidad limita di e pier, e evento aki ya ta completamente bendi.
Representando nos dushi Papiamento, nos orguyo JEON lo ta bek na Aruba despues di un break musical pa yegada di su prome yui y tambe alrededor di 8 presentacion na Hulanda y Alemania den e ultimo siman di juli. E lo t’ey cu su banda y cu un show completamente nobo.
Pa loke ta e anuncio cu a agrega e banda di reggae Spaño, Cultura Profética tambe a causa bastante furor na Aruba. Tur caminda riba rednan social por a mira palabranan manera : ‘Porfin’, ‘Awo si mi ta bay’ , ‘Pabien pa e bon decision’, ‘Na gang nos ta bay’ , ‘My dream come true’. E banda ta cosechando exito for di aña 1996 y lo pisa tera cu un delegracion di riba 30 hende pa un show espectacular.
Ticketnan pa e evento aki ta na benta na Citgo Boulevard, Citgo Essoville, Pay.aw y brightsummeraruba.com.
Bright Summer Festival ta Powered by Amstel Bright, CasaAmigos Tequila, Romar Trading, Embassy Suites, Renaissance Wind Creek Aruba Resort, Rayo, Kini Kini, Elite Empire & Entertainment, Pelican Pier y Infinity Media & Events.
