Na El Salvador dia 24 juli 2025 cu inmenso alegria un Arubiano a keda nomina y aproba unanimemente pa ricibi e titulo di Doctor Honoris Causa. Ribe facebook di Minguel Genser e la post su storia y alegria cu nos di EAnews tambe ta comparti cu comunidad di Aruba.
Mi kier a comparti cu boso un momento cu a touch mi alma profundamente, un momento cu ta honra mi pasado na mesun momento ta habri caminda pa e futuro. Mi a wordo nomina y aproba unanimemente pa ricibi e titulo di Doctor Honoris Causa, un distincion cu mi ta accepta cu humildad y profundo gratitud.
Mi a nace y a wordo cria den e curazon di Aruba, y mi tin cu bisa cu nunca mi a imagina cu mi trajectoria di mi bida lo por resona mas leu cu nos propio fronteranan. Semper mi a laga mi mes wordo guia pa e deseo di sirbi, ya sea den hospital / clinicanan, na SVb, studio di grabacion, escenarionan of dojang, creyendo firmemente cu e pasion, e disciplina y e compasion ta habri portanan cu titulonan, riba nan mes, no por habri.
Awe mi tin e honor cu mi trajectoria a wordo reconoci pa tres institucion academico destaca internacionalmente:
* Remzion University of Jerusalem (RUJ), Israel
* Instituto Tecnológico y Universitario del Estado de México (ITUEM)
* Honorable Academia Mundial de Educación (HAME)
E propuesta pa mi nominacion a wordo presenta pa e ‘Colegio Oficial Internacional de Doctores’ (COID), bou di e direccion di Dr. Alexis Hernandez y cu e apoyo di Dr. Edwin Ponce, representante internacional di COID. A traves di un proceso riguroso y exhaustivo di revision di mi CV, e instutitonan menciona ariba a dicidi, di manera unanime, otorga mi e distincion aki.
Recibi e reconocimento aki, no solamente como dokter, sino tambe pa mi trabou realisa como musico, actor y maestro di Taekwondo, ta yena mi cu agradecimiento inmenso. Nunca mi a persigui titulonan pa vanidad of fama, sino cu semper mi a kere den e proposito patras di e trabou: cura, inspira, educa y eleva otronan.
Como dokter specialista den Salud Ocupacional, mi a dedica mi carera na eherce e trabou den e mihor di mi habilidadnan te hasta ta e administrador di e expediente digital mediconan. Mi labor semper tin un meta cla: cuida e trahadornan malo lo mihor posibel conforme e ley di seguro.
Na mesun momento, mi a bin ta cultiva un bida paralel yena di arte, cultura y movimiento. Como cantautor, productor y musico, mi a comparti e esencia de mi tera tanto cu publico di Aruba, como di exterior. Mi musica semper tabata e brug emocional cu e mundo.
Mi amor pa e arte teatrico a hiba mi den e mundo di actuacion, caminda mi a protagoniza den e pelicula Arubano, Abo So, un experiencia transformador cu a permiti mi representa nos cultura den e pantaya grandi. Pa mi, arte tin e mesun poder di sanacion cu medicina: e ta touch e alma.
Y den e mundo di Taekwondo, cu mas di 30 aña di practica y mas di 2000 hora dedica voluntariamente na e enseñanza, nos ta formando generacion di hobennan a traves di valornan manera e respet, perseverancia, autocontrol y e spirito indomabel. Como Maestro 4de Dan, certifica pa Kukkiwon na Corea di Sur, nos ta sigui promove un caminda di crecimento personal y di disciplina.
E Doctorado Honoris Causa no ta pertenece solamente na ami. E ta tambe di mi patientnan, mi studiantenan, mi coleganan den musica / arte, medicina y deporte, pero mas cu tur cos: e ta dedica pa Aruba. Paso e isla aki ta mi raiz, mi identidad y mi motor.
Tambe mi kier a gradici COID pa a haci mi miembro internacional y pa brinda mi e oportunidad di participa den nan ceremonia asina significativo.
E reconocimiento aki no ta un final, sino un comienso nobo. Lo mi continua traha cu ainda mas pasion, mas entrega y mas amor pa lo cual cu mi ta haci. Lo mi sigui den e arte di medicina, den enseñansa di Taekwondo, creando y sirviendo mi pais.
Di lo mas profundo di mi alma y curason Arubiano, danki.
Cu gratitud,
Dr. Miguel Angel Gustav Genser
