Entidat Públiko Boneiru ta lamentá profundamente ku nan a hòrta e banderanan ku gobièrnu a pone na diferente rotònde na honor di Dia di Boneiru 2025. Propósito di e banderanan akí tabata pa nan para komo símbolo di orguyo, unidat i rèspèt pa nos isla i nos komunidat.
“Esaki no ta djis kestion di kue un pida paña bai kuné. Ta trata akí di hòrtamentu di un símbolo ku ta konektá nos tur. E akto akí ta un falta di rèspèt kontra Boneiru, kontra nos kultura i kontra nos dia di fiesta,’ segun Entidat Públiko Boneiru.
Ponementu di bandera ta forma parti di e preparashonnan anual pa Dia di Boneiru, nos dia di solidaridat i selebrashon di nos identidat. E echo ku intenshonalmente a kita e banderanan akí, ta afektá nos komunidat profundamente.
Na nòmber di Entidat Públiko Boneiru, sekretario insular Christopher Frans mesora a hasi denunsia na polis. Banda di esaki Entidat Públiko Boneiru ta hasi un yamada urgente riba tur hende ku tin informashon tokante e ladronisia akí, pa méldu na polis.
‘Laga nos demostrá ku nos komo komunidat no ta pèrmití ku komportashon sin rèspèt ta mina nos dia di fiesta i nos sentido di solidaridat.’