Aña 2025/2026 mester bin kambio drastiko pa e mucha i dosente
E siman ku drenta aki nos muchanan/hobennan i dosente ta kuminsa ku aña eskolar nobo. Pa Frakshon MAN-PIN nos kier para ketu na e komienso di e aña eskolar ku ta habri un biaha mas ku hopi reto pa loke ta nos enseñansa.
Enseñansa pa nos ta hopi importante pa e pais di futuro ku nos kier. Pa e motibunan aki e retonan den sektor di enseñansa ta hopi importante pa haña atenshon i solushon konkreto. Den nos plan di Vishon pa elekshon ultimo nos a pone kosnan konkreto pa e sektor ku nos ta kere mester ser atende i kambiane rumbo ku nos enseñansa ta bai.
E puntonan aki ta:
Drecha salario di dosentenan
Formashon pa nos dosentenan (upgrading, traha ku e.o. Inteligensia Artifisial)
Drecha infrastruktura di skolnan na forma moderno i agradabel
Mas atenshon pa enseñansa spesial
Atende nivel di nos enseñansa den tur aspekto
Atende ku nesesidat di trahado social den skol
Drecha nos enseñansa Universitario (di manera ku mas hoben ta skohe pa keda studia na Kòrsou)
Nos a konose ultimo tempunan dos rapòrt pa loke ta nivel i kalidat di nos enseñansa aktual kual ta mustra e realidat pero tambe e kambionan ku nos mester atende. Frakshon MAN-PIN ta kere den un sistema di enseñansa ku ta duna tur mucha e oportunidat pa desaroyá i krese sin distinshon. Pa nos ningun mucha no por keda atras. Pesei den tratamentu di presupuesto 2025 nos a presentá un moshon ku a keda aprobá pa tur hende den Parlamento. E moshon aki ta pa Gobièrnu introdusí un sistema pa kubri “bijles” pa e mucha ku tin e nesesidat pero e mayor no tin e forsa finansiero pa hasi esaki.
Pa e aña eskolar 2025-2026 nos lo sigui lucha pa esaki bira un realidat pa e mucha/hoben ku mester un èkstra yudansa den materianan di skol por haña esaki sin ku e ta bira un preshon finansiero riba e mayor ku no por karga esaki.
For di aki nos frakshon ta deseá tur nos hobennan/studiante, maestronan i mayornan tur klase di eksito pa aña eskolar nobo. Ku boso tur lo por sigui konta i tende di nos riba tur e puntonan pa drecha nos enseñansa i nos Kòrsou.