“48 Hour Film Project Curaçao” ta bèk i inskripshon pa e kompetensia di pelikula kòrtiku a habri ofisialmente. Esaki lo tuma lugar den wikènt di 17 te ku 19 di òktober. Tur hende ku tin kreatividat por partisipá; no ta importá si bo tin of nò tin eksperensia. E kompetensia úniko aki ta tuma lugá pa di 9 biaha kaba na Kòrsou, anto e ganadornan ta haña e oportunidat pa partisipá den e festival internashonal di pelikula kòrtiku Filmapalooza na Lisboa den 2026 ku chèns di yega te na e famoso Festival di Pelikula di Cannes, Fransia.
Konsepto di 48 Hour Film Project
E kompetensia internashonal aki a kuminsá den 2001 na Washington D.C., Merka, i awor e ta un fenómèno mundial. E konsepto ta simpel: ekiponan tin un wikènt pa skirbi, graba i harma un pelikula kòrtiku di 4 te ku 7 minüt. Tur team ta risibí un atributo ku obligatoriamente mester wòrdu inkluí den e pelikula tambe un rekisito, un personahe i un frase spesífiko. Promé ku kuminsá, kada tim ta saka un ‘genre’ úniko ku ta determiná e tipo di pelikula. E aventura ta kuminsá djabièrnè dia 17 di òktober 7’or di atardi, i timnan tin 48 ora pa entregá nan obra final.
Screening i Awardshow
Djarason dia 29 di òktober tur pelikula ku a wòrdu traha durante dje kompetensia lo wòrdu presentá na The Movies Punda, sigui pa un awardshow spektakular djawebs 30 di òktober. E pelikulanan por gana premio den diferente kategoria, inkluyendo Best Film, i Favorito di Publiko. Entrada p’e dos eventonan por wòrdu kumpra via di e wepsite di The Movies Curaçao i na bali di The Movies Punda. Pueblo di Kòrsou ta wòrdu invita pa bin wak e pelikulanan i asina apoyá e timnan.
Bishita Speshal
Danki n’e esfuerso di e organisadornan lokal, den kolaborashon intensó ku Curaçao Film Office, e Awardshow di 30 di òktober lo wòrdu presensia dor di e fundadó i Presidente di 48 Hour Film Project, Sr. Mark Ruppert. Durante su bishita na Kòrsou, Señor Ruppert lo tene varios reunion pa wak si Kòrsou por sirbi komo anfitrion di e festival internashonal Filmapalooza. Si logra organisá Filmapalooza aki na Kòrsou, esaki lo por ta un impulso signifikante p’e komunidat di film i ekonomia di Kòrsou.
Ronda internashonal
E pelikula ku gana na Kòrsou lo wòrdu presentá na Filmapalooza ku ta tuma lugar den mart 2026 na Lisboa. Durante Filmapalooza e pelikula ganadó di Kòrsou lo wòrdu mustra huntu ku alrededor di 200 pelikula kòrtiku di otro siudatnan rònt mundu. E festival akí ta duna un oportunidat úniko pa krea un netwòrk internashonal i sera konosí ku produktornan i cineastanan internashonal. Danki na sosten di spònsernan lokal, miembronan di e pelikula ganadó di Kòrsou ta haña e oportunidat di biaha pa Lisboa. E mihó pelikulanan di Filmapalooza ta haña un chèns pa yega en Festival di Pelikula prestigioso na Cannes, Fransia.
Organisashon
48 Hour Film Project Curaçao ta wòrdu organisá pa Melissa Verboeket di Maction Caribbean B.V. i Bert Aengenendt. Segun Sra. Verboeket: “Nos ta super orgulloso ku nos por organisá e kompetensia aki na Kòrsou pa de 9 biaha kaba, i ku e organisashon internashonal ta konsiderando pa trese Filmapalooza aki na Kòrsou. Esaki ta nifiká ku nos mester inspirá hende pa partisipá paso kon bunita e lo ta si na un Filmapalooza na Kòrsou, un ekipo lokal lo gana e premio grandi?” Sr. Aengenendt ta agregá:
“E kompetensia aki ta duna un oportunidat úniko pa formá un team i test nan kreatividat. E úniko kos ku bo tin mester ta un pashon pa film i pa konta un kuenta ku por kaptivá. Na final bo ta wak bo pelikula ku bo a traha den un wikent riba un pantaya grandi!”. Ambos organisadó ta enfatisá: “No ta importá si bo ta traha ku un smartphone of ku un kamara profeshonal, bo por usa lo kual ta na bo disposishon — basta ku bo inkluí e atributonan obligatoirio i entregá bo film den 48 ora. I spesial pa estudiantenan: tuma e reto, yama bo amigu, tuma bo kamera òf smartphone i mustra ku historia bo por kontá den 48 ora!”
Partisipashon
Bishitá 48hourfilm.com/curacao òf e paginanan di media sosial di 48 Hour Film Project Curaçao pa mas informashon i pa registrá bo team. Tambe bo por tuma kontakto via e-mail: curacao@48hourfilm.com of yama na 6995533 pa mas informashon.
Yuda nos hasi e diferensia!
E di 9 edishon di 48 Hour Film Project Curaçao ta posibel danki na e sosten generoso di CX PayMe, MCB, Curaçao Film Office, Mangusa Hypermarket, IFA Solar Energy, Vidanova Bank, Kia/Universal Motors, 2Bays Curaçao i Enterprise Rent-A-Car.
Bo ke pone bo kompania den e spòtlight i na mes tempu kontribuí na desaroyo di talento lokal i kreatividat? Spònser e proyektonan inspiradó aki! Tuma kontakto via curacao@48hourfilm.com i duna bo apoyo na komunidat di film na Kòrsou.
