E reunion tabata den cuadro di mantene un dialogo constructivo entre e liderazgo parlamentario y representante di estado como tambe hefe di gobierno.
Durante e encuentro, Sra. Arends-Reyes a comparti cu su Excelencia Gobernador e prioridadnan di e fraccion AVP pa e periodo legislativo. Di locual cu por comparti ta trata di temanan importante, incluyendo: necesidad pa restaura confiansa den sector publico y servicio na consumidor, promove un economia sostenibel cu bienestar comparti y trece cambionan positivo den tur sector pa nos pueblo di Aruba.
Tambe a dialoga tocante e desaroyonan tumando luga riba nos isla den tur area, di e retonan na corto y largo plazo, incluyendo e situacion regional y reto geopolitico.
Otro punto cu a bin dilanti ta e enfoke riba desaroyo di hoben y educacion superior. E lider di fraccion a enfatisa e compromiso di AVP pa continua cu enfasis riba mobilidad social di nos pueblo.
E bishita a tuma luga den un ambiente di respet y dialogo habri. E fraccion di AVP ta gradici Su Excelencia Gobernador Boekhoudt pa e oportunidad di dialogo y pa su rol den e fortalecemento di nos democracia.